32:330  interitu  distabat,  idque  coniicio  ex  adverbio  temporis  nunc,  quod  mihi  videtur  emphaticum  :  ac  si  diceret  propheta,  Dum  sub  tentationum  mole  aegre  fideles  respirant,  opportunum  esse  tempus  quo  secum  reputent  qualiter  ab  initio  Deus  et  per  continuam  aetatum  seriem  populum  suum  exercuerit.  Simul  ac  Deus  hostium  nostrorum  libidini  habenas  laxavit,  moerore  constricti  tantum  in  praesenti  malorum  sensu  occupamur,  hinc  nascitur  desperatio:  quia  in  mentem  non  venit,  idem  quoque  patientiae  examen  sumptum  esse  de  patribus,  nec  quidquam  nobis  accidere  quod  non  experti  sint.  Hoc  ergo  fidelibus  optimum  solatii  genus,  si  oculos  referant  ad  vetusta  ecclesiae  certamina,  agnoscant  semper  laborasse  sub  cruce,  iniusta  hostium  violentia  duriter  fuisse  vexatam.  Iam  mihi  non  occurrit  melior  coniectura,  quam  Psalmum  fuisse  compositum  postquam  ab  exilio  reversus  fuerat  populus,  et  a  suis  vicinis  graves  multas  acerbasque  iniurias  perpessus,  tandem  sub  tyrannide  Antiochi  propemodum  defecit.  In  illa  igitur  turbida  caligine,  propheta  fideles  ad  fortitudinem  animat:  nec  paucos  solum,  sed  sine  exceptione  totum  corpus:  iubetque,  ad  sustinendos  tam  duros  insultus,  hunc  bonae  spei  clypeum  opponere,  ecclesiam  Dei  patiendo  semper  stetisse  victricem.  Ac  singulis  prope  verbis  subest  pondus.  Dicat  nunc  Israel,  hoc  est,  secum  vetera  experimenta  reputet,  ex  quibus  colligere  licebit  Dei  populum  nunquam  a  crucis  tolerantia  fuisse  immunem,  felici  tamen  eventu  variis  afflictionibus  fuisse  semper  probatum.  De  hostibus  autem  indefinite  loquendo,  gravitatem  exaggerat  magis  quam  si  Assyrios  vel  Aegyptios  nominasset.  Certum  enim  genus  non  designans  mundum  subindicat  innumeris  hostium  copiis  refertum  esse,  quos  facile  armat  Satan  ad  bonorum  perniciem,  ut  omni  ex  parte  nova  subinde  bella  emergant.  Et  certe  satis  testantur  historiae,  non  fuisse  negotium  populo  Dei  cum  paucis  hostibus,  sed  a  toto  fere  mundo  oppugnatum:  deinde  non  ab  externis  tantum  hostibus,  sed  a  domesticis  exhibitas  fuisse  molestias.  Iuventutis  nomine  intelligit  prima  exordia,  non  tantum  quum  Deus  populum  eduxit  ex  Aegypto,  sed  quum  Abraham  et  patriarchas  laboriosa  militia  per  totam  fere  vitam  confecit.  Quum  vero  immaniter  exagitati  essent  in  terra  Chanaan,  posteris  Aegyptus  deterior  fuit  habitatio,  ubi  non  modo  serviliter,  sed  etiam  probrose  fuerunt  oppressi.  In  egressu  scimus  quanta  difficultas.  Ab  eo  tempore  si  quid  relaxationis  datum  est,  non  tamen  diuturna  quies  fuit  usque  ad  regnum  Davidis.  Quanquam  autem  tunc  visa  fuit  beata  eius  conditio,  non  multo  post  exortae  sunt  turbae  atque  etiam  clades,  quae  Dei  populo  exitium  minitarentur*  Exilio  babylonico  parum  abfuit  quin  sine  ulla  spe  tanquam  sepulcro  abditi  putrefierent.  Post  reditum  vix  breves  induciae  ad  respirandum  datae  sunt.