1:330  40.  Itaque  quod  hic  detrahit  hominibus  alibi  soli  Deo  tribuit  in  precatione.  Deus,  inquit  (Eph.  1,  17),  et  pater  gloriae  det  vobis  spiritum  sapientiae  et  revelationis.  Iam  audis  omnem  sapientiam  et  revelationem  esse  Dei  donum.  Quid  tum  praeterea?  Illuminatos  oculos  mentis  vestrae.  Certe  si  nova  revelatione  indigent,  a  se  ipsis  caecutiunt  Sequitur  deinde:  ut  sciatis  quae  sit  spes  vocationis  vestrae,  ete.  Ergo  tantae  intelligentiae  non  esse  capaces  hominum  mentes,  ut  vocationem  suam  noverint,  fatetur.  Neque  hic  garriat  Pelagianus  quispiam,  huic  vel  stupiditati  vel  ruditati  Deum  succurrere,  dum  verbi  sui  doctrina  eo  dirigit  hominis  intellectum,  quo  sine  duce  pervenire  non  poterat  Habebat  enim  David  legem,  in  qua  quidquid  sapientiae  desiderari  potest  comprehensum  erat;  neque  tamen  eo  contentus  oculos  sibi  retegi  postulabat  (Psal.  119,  18),  ut  legis  ipsius  mysteria  consideraret.  Qua  certe  locutione  innuit,  solem  exoriri  terris,  ubi  hominibus  Dei  verbum  illucet;  verum  eos  non  multum  inde  consequi,  donec  oculos  vel  dederit  vel  aperuerit  ille  ipse,  qui  ideo  pater  luminum  vocatur  (Iac.  1,  17),  quia  ubicunque  spiritu  suo  non  resplendet  omnia  tenebris  occupantur.  Sic  et  apostoli  ab  optimo  quidem  magistro  rite  et  abunde  edocti  fuerant  Nisi  tamen  indigerent  spiritu  veritatis,  qui  eorum  mentes  hac  ipsa  doctrina  quam  ante  audierant  erudiret,  non  illum  exspectare  iuberentur  (Ioan.  14,  26).  Si  quod  petimus  a  Deo  deesse  nobis  confitemur,  et  ipse  in  eo  quod  promittit  nostram  arguit  inopiam:  nemo  iam  fateri  dubitet,  se  tantum  ad  intelligenda  Dei  mysteria  valere,  quantum  eius  gratia  fuerit  illuminatus.  Qui  sibi  plus  intelligentiae  tribuit,  eo  caecior  est,  quod  caecitatem  suam  non  agnoscit  41.  Restat  tertium  illud  membrum,  de  cognoscenda  vitae  probe  componendae  regula,  quam  verae  operum  iustitiae  notitiam  nuncupamus:  ubi  videtur  mens  humana  esse  aliquanto,  quam  in  superioribus,  acutior.  Siquidem  testatur  apostolus  (Rom.  2,  14),  gentes  quae  legem  non  habent,  dum  legis  opera  faciunt,  sibi  pro  lege  esse,  ac  ostendere  opus  legis  scriptum  in  cordibus  suis,  testimonium  illis  reddente  conscientia,  et  cogitationibus  inter  se  accusantibus  aut  excusantibus  coram  iudicio  Dei.  Si  gentes  naturaliter  legis  iustitiam  habent  mentibus  suis  insculptam,  certe  non  dicemus  eas  in  vitae  ratione  prorsus  caecutire.  Et  nihil  est  vulgatius,  quam  lege  naturali  (de  qua  istic  apostolus  loquitur)  hominem  sufficienter  ad  rectam  vitae  normam  institui.  Nos  vero  expendamus,  quorsum  indita  hominibus  haec  legis  notitia  fuerit;  tum  protinus  apparebit  quousque  illos  ad  rationis  veritatisque  scopum  deducat.  Id  quoque  ex  Pauli  verbis  liquet,  si  quis  dispositionem  observet.  Dixerat  paulo  ante,  eos  qui  in  lege  peccaverunt  per  legem  iudicari;  qui  sine  lege  peccaverunt,  sine  lege  perire.  Hoc  quia  poterat  absurdum  videri,  ut  sine  ullo  iudicio  praecedente  gentes  pereant,  continuo  subiicit,  suam  illis  conscientiam