39:33  33  IN  IEREMIAM.  CAP.  XXXII.  haec  excusatio:  sed  Deus  ne  prolixius  litiget  cuin  superstitiosis,  sumit  hoc  principium,  quidquid  tentant  praeter  legem,  hoc  esse  adulterinum,  et  ideo  non  posse  ullo  colore  fucari  omnium  hominum  commenta.  Sciamus  ergo  veram  pietatem  fundatam  semper  esse  in  obedientia.  Itaque  ubi  nullum  exstat  Dei  praeceptum,  non  modo  frivolum  est  sed  abominabile  quidquid  a  se  ipsis  confingunt  homines,  quemadmodum  heri  dictum  fuit  de  opere  manuum:  ita  etiam  hic  opponitur  mandatum  Dei  omnibus  hominum  commentis.  Sed  quoniam  saepius  occurrunt  tales  sententiae,  hunc  locum  nunc  levius  attingo.  Est  tamen  doctrina  haec  apprime  notatu  digna,  non  opus  esse  longis  refutationibus  ubi  volumus  coarguere  fictitios  cultus,  quos  sibi  homines  ex  proprio  sensu  fabricant:  quia  postquam  omnia  dixerint,  uno  verbo  respondet  Deus  quidquid  non  praecipit  sua  lege,  hoc  esse  vanum  et  perversum.  Dicit  igitur  hoc  se  non  mandasse  illis,  nec  unquam  sibi  venisse  in  mentem.  Transfert  Deus  ad  se  quod  non  potest  competere  nisi  in  homines.  Dicitur  enim  hoc  improprie  de  ipso  Deo  non  venisse  hoc  vel  iliud  illi  in  mentem.  Sed  hic  perstringit  hominum  superbiam,  dum  audent  hoc  vel  illud  comminisci,  et  existimant  gratum  fore  Deo  cultum,  quem  ipsi  temere  excogitarunt.  Volunt  enim  hoc  modo  excellere  sapientia  supra  Deum  ipsum.  Nam  videmus  etiam  hodie  papistas,  quum  ostendimus  nihil  ex  ore  Dei  profectum  esse  ex  tota  congerie  observationum,  in  quibus  religio  ab  ipsis  statuitur,  proferre  semper  in  medium  hoc  non  abs  re  fuisse  mandatum  a  patribus:  quasi  vero  aliquid  venerit  hominibus  in  mentem  quod  Deum  ipsum  praeterierit.  Videmus  ergo  ut  salse  derideat  hoc  loco  Deus  eorum  amentiam,  qui  proprio  ingenio  freti  fingunt  sibi  varios  cultus.  Volunt  enim  sapere  supra  ipsum,  quemadmodum  diximus.  Nunc  ergo  tenemus  quam  emphatica  sit  ista  loquutio,  ubi  negat  Deus  sibi  unquam  venisse  in  mentem,  quod  homines  iactant  non  sine  ratione  fuisse  excogitatum,  et  in  quo  acumen  suum  venditant  ac  si  aliquid  melius  statuere  possent,  quam  Deus  ipse.  Postea  dicit,  Ut  facerent  abominationem  hanc.  Iam  ultra  progreditur  Deus.  Nam  vocat  abominationem  quidquid  non  praecepit.  Et  contextus  hic  confirmat  quod  nuper  dixi,  non  opus  scilicet  esse  longis  argumentis,  ubi  quaestio  agitatur  de  commentis  hominum.  Nihil  enim  potest  probari  in  cultu  Dei  nisi  quod  mandavit  ipse.  Ergo  non  modo  inane  ac  frivolum,  et  inutile  est  quidquid  profectum  est  ex  hominum  sensu,  sed  etiam  abominatio.  Deus  enim  ita  definit  hoc  loco:  ideo  non  satis  est  hodie  repudiare  et  ludibrio  habere  fictitios  cultus  in  quibus  tantopere  superbiunt  papistae:  sed  si  volumus  probare  verum  pietatis  zelum,  necesse  est  abominari  omnia  illa  figmenta.  Deus  enim  ita  semel  pronuntiavit.  Dicit,  Ut  pec-  Calvini  opera.  Vol.  XXXIX.