24:33  33  COMMENTARIUS  IN  EXODI  CAP.  III.  34  intermedii  temporis  finem  exprimit.  Ergo  quum  ad  octogesimum  aetatis  annum  provectus  esset,  ductaque  uxore  consenuisset  in  terra  Madian,  filiis  Israel  intolerabilis  tyrannidis  saevitia  novos  gemitus  et  clamores  extorsit:  non  quod  tunc  primum  coeperint  dolere  et  lamentari  :  sed  quia  magis  expergefacti  fuerunt,  et  diuturnitas  addidit  stimulos  acriores.  Scimus  dulce  miseriarum  condimentum  esse  spem  laetioris  exitus.  Ea  quodammodo  tristitiam  mulcebat  afflicti  populi,  si  tyranno  mortuo  succederet  quispiam  humanior.  Ubi  vero  regis  mutatio  nulla  ex  parte  oppressionem  levavit,  auctus  est  moeror,  qui  ad  clamandum  eos  solito  ardentius  coegit.  Sic  igitur  verba  Mosis  interpretor,  mortuo  tyranno  nihilo  clementius  vel  mitius  fuisse  tractatos  filios  Israel,  ideoque  vehementius  clamasse.  Quanquam  mihi  verisimile  est:  Pharaonem  illum  qui  primus  gravia  onera  cum  tributis  imposuerat,  ac  caedi  destinaverat  infantes,  non  eo  usque  vixisse:  quia  superasset  eius  regnum  annos  octoginta,  quod  accidere  non  solet.  Antequam  nasceretur  Moses,  iam  pluribus  annis  misere  vexati  fuerant  Israelitae.  Neque  enim  primo  die  ad  tantam  atrocitatem  prosiliit  ut  iuberet  masculos  omnes  interfici:  sed  postquam  expertus  erat  se  nihil  proficere  aliis  imperiosis  edictis  hoc  extremum  tentaverat.  Post  natum  Mosen,  usque  ad  tempus  quod  hic  describitur,  praetereunt  anni  circiter  octoginta.  Unde  coniicere  licet,  antequam  instaret  liberatio  fuisse  medium  aliquem  successorem,  vel  plures.  In  illa  multiplici  rerum  conversione,  quum  eadem  esset  vel  deterior  populi  conditio,  insolitam  lamentationem  expressit  ultima  necessitas:  atque  etiam  desperatio  eos  ad  preces  compulit:  non  quod  ante  nulla  penitus  esset  Dei  invocandi  cura,  sed  quia  nimis  huc  et  illuc  circumspectabant,  donec,  praecisis  omnibus  terrenis  mediis,  in  coelos  violenter  ad  quaerendum  serio  auxilium  tracti  sunt.  Quo  exemplo  docemur,  quamvis  nos  malorum  gravitas  tristitia  et  luctu  conficiat,  non  tamen  protinus  ad  Deum  vota  nostra  dirigi,  sed  nostram  segnitiem  pluribus  stimulis  opus  habere.  Admonet  etiam  Moses,  nihil  esse  mirum  si  Deus  ad  opitulandum  non  citius  accurrerit,  quando  in  suis  malis  torpebant  filii  Israel.  Proinde  hoc  exemplo  discamus,  ut  Deus  gratiam  suam  proferre  maturet,  statim  ad  eum  confugere.  Ascenditque  clamor.  Commendat  Dei  clementiam  Moses  hac  circumstantia,  quod  pigritiam  eorum  non  ultus  fuerit,  ut  digna  erat,  sed  lentis  clamoribus  se  praebuerit  exorabilem.  Ac  omnino  in  hac  historia  contemplari  licet  quod  Psalmo  107  legitur,  stupidissimos  etiam  quosque  in  rebus  extremis  vota  sua  demum  ad  Deum  convertere,  et  quidem  vehementia  doloris  magis  quam  rite  composito  fidei  affectu.  Dicit  a  servitute,  quia  proprium  Dei  est  succurrere  oppressis,  liberare  vinctos,  et  miseros  erigere  :  atque  Calvini  opera.  Vol.  XXIV.