54:329  329  SUR  LA  SECONDE  A  TIMOTHEE.  330  combats  nous  est  commun,  que  nous  rendions  louange  a  celuy  qui  les  fortifie.  Car  Dieu  les  a  tellement  voulu  armer  de  constance  pour  se  servir  d'eux  en  maintenant  la  querelle  de  sa  verite,  que  cependant  il  veut  que  nous  en  soyons  edifiez.  Voila  donc  comme  la  mort  des  Martyrs  (c'est  a  dire  des  tesmoins  de  Dieu)  est  un  sacrifice,  Mais  quoy?  Tant  s'en  faut  que  nous  soyons  disposez  de  prendre  ceci  a  nostre  profit,  que  nous  laissons  couler  tout.  Or  il  est  dit  que  les  larmes  des  fideles  sont  precieuses  devant  Dieu,  comme  s'il  les  tenoit  en  une  pbiole  comme  un  onguent.  Et  que  sera-ce  de  leur  sang  quand  nous  le  laisserons  couler,  que  nous  n'en  serons  point  arrousez  pour  glorifier  nostre  Dieu?  Et  tant  s'en  faut  que  cela  se  face,  que  ceux  qui  se  diront  estre  grans  supposts  de  l'Evangile,  on  voit  que  le  nom  de  Martyrs  leur  est  puant,  qu'ils  ne  le  peuvent  porter.  Ils  monstrent  bien  par  cela  qu'ils  sont  des  chiens  mastins,  qu'il  n'y  a  de  Chrestiente  en  eux  non  plus  qu'en  des  pourceaux,  quand  ils  ne  scavent  pas  les  mots  les  plus  communs  de  l'Escriture  saincte.  Or  retenons  de  nostre  coste,  que  ce  n'est  point  sans  cause  que  sainct  Paul  a  parle  ainsi,  que  ce  n'a  point  este  une  ambition  qui  l'a  incite  a  cela,  mais  qu'il  vouloit  que  sa  mort  fust  utile:  et  non  seulement  pour  un  temps,  mais  iusques  a  la  fin  du  monde,  il  a  fait  que  la  memoire  en  est  perpetuelle.  Cependant,  combien  que  nous  ne  soyons  pas  tous  appelez  a  cela,  que  Dieu  nous  face  cest  honneur  de  passer  par  le  glaive,  ou  par  le  feu,  afin  de  rendre  tesmoignage  a  son  Evangile,  si  fautil  qu'en  la  vie  et  en  la  mort  nous  luy  soyons  sacrifices,  qu'en  nostre  vie  nous  ensuyvions  ce  que  dit  sainct  Paul  au  douzieme  chapitre  des  Romains,  Que  nous  soyons  hosties  vivantes  a  nostre  Dieu.  Et  pour  ce  faire,  que  tout  ce  qui  est  de  nostre  nature,  meure,  et  soit  abbatu:  voire,  et  le  meilleur  que  nous  cuidons  avoir,  c'est  nostre  raison,  qu'elle  soit  tellement  amortie  en  nous,  que  l'Esprit  de  Dieu  nous  gouverne,  afin  que  nous  luy  soyons  des  sacrifices  vivans.  Voila  donc  comme  les  Chrestiens  doyvent  appliquer  leur  estude  a  s'offrir  a  Dieu,  pour  luy  estre  dediez  en  toute  leur  vie.  Et  en  la  mort  comment  luy  serons-nous  sacrifices?  Quand  nous  serons  prests  de  sortir  du  monde,  toutes  fois  et  quantes  qu'il  plaira  a  Dieu  de  nous  en  retirer,  que  nous  ne  regimbions  point  a  l'encontre  de  luy,  mais  que  paisiblement  nous  venions  nous  offrir,  Seigneur,  tu  nous  as  creez,  tu  nous  as  nourris  et  entretenus  iusqu'a  maintenant:  il  faut  donc  que  tu  disposes  de  nous  a  ta  volonte,  et  que  nous  n'y  resistions  point  en  facon  que  ce  soit.  Voila  donc  comme  nous  devons  prendre  courage:  combien  que  nous  ne  souffrions  point  pour  l'Evangile,  voyans  que  Dieu  accepte  et  nostre  vie,  et  nostre  mort  comme