32:329  329  PSALMUS  CXXIX.  330  occupet  ac  detineat:  quia  spem  futurae  vitae  minime  suffocari  decet.  Quo  fit  ut  non  semper  potiamur  aequaliter  Dei  beneficiis.  5.  (Benedicet  tibi)  Quidam  precationem  esse  volunt,  atque  ita  futurum  tempus  resolvunt  in  optativum,  sed  potius  videtur  contextus  esse  eiusdem  doctrinae:  quia  clarius  nunc  exprimit  propheta,  bonorum  quae  retulit  Deum  esse  autorem.  Etsi  enim  saepe  nobis  ante  oculos  versantur  eius  dona,  tamen  eorum  conspectum  falsae  imaginationes  obscurant.  Quare  supervacua  haec  repetitio  non  fuit,  a  Deo  benedici  fideles  quoties  aliquid  prosperi  evenit.  Dicit  autem  e  Sion,  ut  pios  revocet  ad  memoriam  foederis  quod  Deus  cum  ipsis  pepigerat.  Nam  familiariter  promiserat  se  legis  observatoribus  propitium  fore,  atque  haec  rudimenta  pietatis  a  prima  infantia  imbiberant.  Quare  propheta  nihil  se  novum  vel  prius  inauditum  afferre  docet:  quia  pridem  ex  lege  didicerant,  temporalibus  quoque  beneficiis  palam  fieri,  non  frustra  coli  Deum,  atque  id  re  ipsa  sensuros  asserit.  Sed  quod  addit  de  bono  Ierusalem,  piis  legem  praescribit,  ne  privatim  sibi  tantum  consulant,  vel  propriis  commodis  sint  addicti:  quin  potius  ut  praecipuum  eorum  votum  sit  videre  florentem  Dei  ecclesiam.  Valde  enim  absurdum  esset,  neglecto  corpore  singula  membra  optare  quod  sibi  utile  sit.  Porro  quum  nimis  illuc  cupide  feramur,  non  temere  propheta  studium  publicae  salutis  commendat,  ac  benedictiones  domesticas  sic  permiscet  communibus  ecclesiae  bonis,  ut  sciamus  res  esse  coniunctas,  et  quas  distrahere  fas  non  sit.  PSALMUS  CXXIX.  ARG.  Docet  primo  hic  Psalmus  Deum  hoc  consilio  ecclesiam  suam  variis  molestiis  et  vexationibus  subiicere,  ut  se  melius  liberatorem  eius  ac  vindicem  probet.  Ergo  fidelibus  in  memoriam  revocat  quam  misere  saeculis  omnibus  afflictus  fuerit  Dei  populus,  et  quam  mirabiliter  servatus  :  ut  ex  illis  documentis  spem  in  futurum  tempus  colligat.  Ideoque  in  secunda  parte  sub  forma  imprecationis  docet,  impiis  omnibus  qui  Dei  populum  sine  causa  infestant,  brevi  ultionem  instare.  Canticum  graduum.  1.  Saepe  afflixerunt  me  a  iuventute  mea,  dicat  nunc  Israel  2.  Saepe  afflixerunt  me  a  iuventute  mea,  nec  tamen  potuerunt  contra  me.  3.  Super  dorsum  meum  araverunt  aratores,  protraxerunt  sulcos  suos.  4.  Iehova  iustus  confregit  funes  impiorum.  1.  (Saepe  afflixerunt.)  Probabile  est  Psalmum  hunc  fuisse  compositum  quum  ecclesia  Dei  in  extremas  angustias  coniecta,  vel  magno  aliquo  discrimine  perculsa,  vel  tyrannide  oppressa,  parum  ab