25:329  329  REDITUS  AD  HISTORIAM.  330  28.  Et  praecepit  de  eis  Moses.  Sic  temperat  suum  decretum,  ne  Rubenitis  et  aliis,  ubi  perfuncti  fuerint  militiae  cursu,  fraudi  sit  Iordanem  transiisse,  quasi  ad  novas  sedes  quaerendas:  nec  tamen  si  alias  tribus  frustati  fuerint,  prosit  illis  sua  ignavia  et  dolus.  In  summa,  si  ex  compacto  fratres  adiuverint,  iubet  perpetuo  relinqui  quod  nunc  concedit:  sin  vero  discesserint  a  fide,  vult  cogi  invitos  ad  sortitionem  communem.  Neque  enim  partem  illis  assignans  in  media  terra  Chanaan,  praemium  inertiae,  si  cessaverint,  illis  largitur:  sed  vi  et  imperio  trahendos  esse  significat,  ut  se  fratribus  in  omnes  eventus  subiiciant,  quia  seorsum  sibi  consulere  fas  non  erat.  Caeterum  de  terrae  partitione,  quasi  de  re  mox  futura  praecipiens  omnium  animos  ad  fiduciam  attollit,  quo  alacrius  transitum  accelerent:  ac  si  non  tantum  in  manu  esset  victoria,  sed  mox  quoque  percipiendus  eius  fructus.  33.  Dedit  itaque.  Sic  Mosen  dedisse  intelligas,  ut  Dei  mandato  fretus  legem  inviolabilem  tulerit.  Quanquam  enim  expresse  non  legitur  imperium  Dei  intercessisse,  posterior  tamen  approbatio  id  plane  confirmat:  sicut  nulla  fit  mentio  Eleazar  et  seniorum  quos  tamen  non  fuisse  praeteritos  certum  est,  quin  adhibiti  fuerint  simul  arbitri:  praesertim  quum  a  filiis  Gad  et  Ruben  delata  illis  fuisset  cognitio.  Tantum  subest  tacita  antithesis  inter  antiquum  foedus  quod  Deus  pepigerat  cum  Abraham  et  hoc  novum  ius  ac  speciale,  quo  populum  suum  locupletare  dignatus  fuerat.  Principio  duae  tantum  tribus  nominatae  fuerant:  nunc  additur  dimidia  tribus  Manasse:  quia  scilicet  posteri  Machir,  et  Iair,  et  Noba,  qui  omnes  genus  ducebant  a  Manasse,  urbes  et  vicos  occupaverant.  Quod  enim  sic  vertunt  interpretes,  ac  si  victorias  illas  essent  adepti  ex  quo  Rubenitis  et  Gaditis  permiserat  Moses  trans  Iordanem  habitare:  mihi  non  videtur  consentaneum:  quin  potius  redditur  causa  cur  excepta  fuerit  portio  quae  cessit  filiis  Manasse:  quia  scilicet  fraudandi  non  fuerint  agris  quos  seorsum  acquisierant.  Nec  vero  probabile  est,  quum  aliis  data  esset  regio  trans  Iordanem,  postea  irruptionem  fecisse,  ut  ius  alienum  ad  se  traherent.  Nec  obstat  series  narrationis:  quia  Hebraeis  tritum  est  quae  prius  gesta  sunt  posterius  referre:  praesertim  ubi  per  occasionem  subiicitur  pro  causae  redditione  quod  ante  omissum  fuerat.  Si  quis  tamen  malit  praesenti  commodo  fuisse  allectos,  pertinacius  non  contendam.  Sed  qui  convenit  urbes  fuisse  exstructas  quae  adhuc  incolumes  stabant?  sicuti  ante  vidimus  victorem  populum  in  illis  habitasse.  Nempe,  quia  vix  unquam  contigit  expugnari  urbes,  quin  diruantur  muri,  non  abs  re  talis  instauratio  vocatur  aedificium.  Muniendae  erant  urbes,  ne  imbellis  turba  ad  primos  quosque  hostium  impetus  exposita  esset.  In  hunc  finem  restaurarunt  quae  disiecta