51:328  doit  estre  rendue  simplement  a  Dieu.  Car  ce  n'est  point  sans  cause  que  tant  souvent  il  dit,  Ie  suis  sainct:  et  puis  nous  scavons  que  Iesus  Christ  s'est  sanctifie  pour  nous,  a  fin  que  nous  soyons  lavez  et  nettoyez  de  toutes  nos  pollutions.  Voila  donc  quant  au  premier.  Or  il  y  a  puis  apres  la  cause  de  nostre  foy,  c'est  que  les  hommes  ne  l'obtiennent  pas  sinon  d'autant  qu'ils  sont  attirez  par  un  mouvement  secret,  comme  il  est  dit  qu'il  faut  que  nous  apprenions  de  Dieu,  voire  non  seulement  pource  que  sa  parole  coutient  toute  sagesse,  et  que  par  icelle  nous  sommes  enseignez  fidelement  de  Dieu  de  ce  qui  nous  est  utile:  mais  nostre  Seigneur  Iesus  s'expose  d'avantage:  Celuy  qui  aura  ouy  de  mon  Pere,  dit-il.  Il  parloit  luy  qui  est  la  sagesse  de  Dieu:  mais  il  monstre  que  ce  qu'il  prononcoit  de  sa  bouche  ne  pourroit  profiter,  sinon  que  Dieu  parlast  au  dedans  par  son  sainct  Esprit.  Or  si  Iesus  Christ  o'a  peu  rien  profiter  par  sa  doctrine  sinon  d'autant  que  le  sainct  Esprit  besongnoit  dedans  les  coeurs,  que  sera-ce  de  la  predication  que  nous  pourrons  ouir  de  la  bouche  des  hommes  mortels  qui  ne  sont  rien  ?  Il  faut  bien  donc  que  les  hommes  plantent  et  arrousent,  et  que  Dieu  donne  l'accroissement,  ainsi  que  sainct  Paul  en  parle  au  troisieme  chapitre  de  la  premiere  aux  Corinthiens.  Au  reste,  comme  nous  avons  dit  qu'il  nous  faut  puiser  toute  nostre  sainctete  de  Iesus  Christ,  auquel  nous  en  trouverons  toute  plenitude  :  scachons  aussi  que  par  ce  mot  nous  sommes  advertis  que  nous  ne  sommes  point  appelez  a  ordure  pour  nous  donner  licence  de  mal-faire  :  mais  pour  estre  comme  separez  au  service  de  Dieu.  Plusieurs  se  vanteront  assez  d'estre  fideles,  et  ce  mot  trottera  sur  la  langue  de  chacun:  mais  la  foy  est  une  chose  plus  precieuse  que  nous  ne  pensons,  car  elle  purifie  nos  coeurs,  comme  il  est  dit  an  15  chap.  des  Actes,  a  ce  que  nous  soyons  comme  inis  a  part,  que  nous  soyons  arrengez  pour  nous  dedier  pleinement  a  Dieu.  Or  par  ceci  il  est  signifie  que  les  hommes  sont  comme  d'une  masse  corrompue  et  infecte,  iusques  a  ce  que  Dieu  en  ait  retire  les  uns  d'avec  les  autres.  Nous  ne  differons  donc  en  rien  d'avec  ceux  qui  sont  les  plus  confits  en  tout  mal  et  toute  iniquite  qu'il  est  possible  de  dire  :  nous  sommes  (di-ie)  tous  semblables  quant  a  nostre  nature:  mais  il  faut  que  ceux  qui  croyent  a  nostre  Seigneur  Iesus  Christ  soyent  comme  retirez  de  ce  monde,  ainsi  que  S.  Pierre  aussi  en  parle  en  sa  premiere  canonique.  Et  puis  nous  avons  veu  par  ci  devant  que  par  le  sang  de  Iesus  Christ  nous  sommes  purgez  pour  estre  retirez  de  ce  monde  mauvais:  comme  aussi  il  en  parle  en  S.  Iean,  priant  Dieu  son  Pere,  non  pas  qu'il  nous  retire  du  monde  et  de  ceste  vie  caduque:  mais  a  fin  que  la  malice  du  monde  ne  domine  point  en  nous  et  que  nous  en  soyons  exemptez.