47:328  Ut  glorificetur.  Congruit  hic  locus  cum  Pauli  dicto:  Ut  omnis  lingua  confiteatur,  quod  Iesus  Christus  est  in  gloriam  Dei  patris,  Philipp.  2,  l  l  .  Finis  omnium  est  nominis  Dei  sanctificatio.  Sed  legitimus  sanctificandi  eius  modus  hic  exprimitur,  nempe  in  filio,  et  per  filium.  Nam  quum  nobis  per  se  abscondita  sit  Dei  maiestas,  in  Christo  refulget:  quum  occulta  sit  eius  manus,  eam  habemus  in  Christo  visibilem.  Ergo  in  beneficiis  quae  nobis  largitur  pater,  filium  ab  eo  separare  fas  non  est  iuxta  illud,  Qui  non  honorat  filium,  neque  patrem  honorat.  14.  Si  quid  petieritis,  ete.  Non  est  inanis  repetitio:  vident  omnes  ac  sentiunt  se  indignos  esse  qui  ad  Deum  accedant:  prorumpit  tamen  maior  pars  quasi  lymphatica,  et  Deum  temere  superbeque  compellat.  Postea  quum  subit  in  mentem  illa,  quam  dixi,  indignitas,  varia  sibi  quisque  media  fabricat.  Deus  autem  nos  ad  se  invitans  mediatorem  unum,  per  quem  exorabilis  sit  ac  propitius,  nobis  proponit.  Sed  hic  rursum  exsultat  humani  ingenii  pravitas,  quia  maior  pars  non  desinit  relicta  via  per  flexuosas  ambages  circumire.  Hoc  ideo  fit,  quia  nonnisi  tenuiter  et  maligne'apprehenditur  in  Christo  Dei  potentia  et  bonitas.  Accedit  et  secundus  error,  quod  non  reputamus  a  Dei  accessu  nos  omnes  merito  arceri,  donec  ab  eo  vocemur:  vocari  autem  nonnisi  per  filium.  Quod  si  unum  testimonium  non  satis  apud  nos  habet  ponderis,  sciamus  tamen,  quum  Christus  secundo  iterat  rogandum  in  suo  nomine  esse  patrem,  quasi  manum  nobis  iniicere,  ne  frustra  quaerendis  aliis  patronis  operam  perdamus.  15.  Si  diligitis  me,  praecepta  mea  servate:  16.  Et  ego  rogabo  patrem,  et  alium  paracletum  dabit  vobis,  ut  apud  vos  maneat  in  aeternum.  17.  Spiritum  veritatis,  quem  mundus  non  potest  accipere:  quia  non  videt  eum  neque  cognoscit  eum.  Vos  autem  cognoscitis  eum:  quia  apud  vos  manet  ac  in  vobis  erit.  18.  Non  relinquam  vos  orphanos:  venio  ad  vos.  15.  Si  diligitis  me.  Erat  verus  amor  et  sincerus,  quo  discipuli  prosequebantur  Christum,  qui  tamen  aliquid  habebat  superstitionis  admixtum,  ut  saepe  nobis  quoque  accidit.  Praeposterum  enim  erat  quod  eum  optabant  in  mundo  retinere.  Hoc  vitium  ut  corrigat,  amorem  ipsos  iubet  alio  intendere  :  nempe  ut  servandis  quae  dederat  praeceptis  studium  impendant.  Utilis  certe  doctrina,  quia  ex  his  qui  sibi  Christum  amare  videntur  paucissimi  sunt,  qui  rite  eum  colant:  quin  potius  frivolis  nugis  defuncti  secure  sibi  indulgent.  Hic  autem  contra  verus  Christi  amor  ad  observantiam  doctrinae  eius  quasi  ad  unicam  regulam  exigitur.  Caeterum  etiam  monemur,  quam  vitiosi  sint  alii  nostri  affectus,