32:328  Maior  quidem  pars  sobolem  expetit,  estque  id  fere  a  natura  ingenitum:  sed  plerique  datam  fastidiunt:  deinde  pauperibus  saepe  gratior  est  orbitas,  quam  si  turbam  inopem  relinquerent.  Verum  utcunque  praeposteris  desideriis  varie  et  inconstanter  feratur  mundus,  hanc  suam  benedictionem  Deus  praefert  omnibus  divitiis,  ideoque  et  nobis  in  pretio  habenda  est.  Si  quis  ergo  uxorem  habet  vitae  sociam,  commodis  moribus:  non  minoris  aestimet  hanc  benedictionem  quam  Solomo,  qui  affirmat  Prov.  19,  14  nonnisi  a  Deo  uxorem  bonam  dari.  Si  quis  etiam  pater  sit  magnae  sobolis,  grato  animo  excipiat  tam  praeclarum  beneficium.  Si  quis  obiiciat,  prophetam,  sic  loquendo,  fideles  carnis  illecebris  in  terra  morari,  ne  solutis  et  liberis  animis  in  coelum  adspirent:  respondeo  non  esse  mirum  si  Iudaeis  gustum  gratiae  Dei  paternique  favoris  sub  lege  proposuerit,  quia  tunc  scimus  pueris  fuisse  similes.  Quanquam  sic  eum  temperavit,  ut  ad  coelestis  vitae  meditationem  conscenderent.  Hodie  quoque  nobis,  licet  parcius,  favorem  suum  temporalibus  beneficiis  Deus  testatum  facit:  quemadmodum  nuper  citavimus  ex  Paulo,  1.  Tim.  4,  8,  pietatem  habere  tam  praesentis  quam  futurae  vitae  promissiones.  Sed  hoc  modo  non  iniicitur  nobis  remora  vel  impedimentum  ne  in  coelum  assurgant  mentes  nostrae,  sed  potius  scalae  eriguntur  quibus  gradatim  illuc  conscendant.  Merito  itaque  propheta  fideles  admonet,  fructum  iam  aliquem  suae  integritatis  percipere  dum  illis  victum  Deus  suppeditat,  eos  fortunat  in  coniugio  et  prole,  et  ad  curandam  eorum  vitam  descendit.  Sed  eo  consilio  presentem  Dei  gratiam  commendat,  quo  alacrius  ad  aeternam  suam  haereditatem  festinent.  Quod  si  non  semper  haec  felicitas  piis  contingat,  sed  interdum  uxor  vel  molesta  sit,  vel  superba,  vel  vitiosis  moribus,  si  liberi  etiam  dissoluti  sint  ac  vagi,  imo  patris  domum  dedecore  afficiant:  se  ideo  Dei  benedictione  fraudari  agnoscant,  quod  eam  sua  culpa  repulerint.  Et  sane  si  quisque  sua  vitia  reputet,  fatebitur  terrenis  Dei  beneficiis  iuste  se  privari.  4.  Ecce  certe  sic  benedicetur  vir  timens  Iehovam.  5.  Benedicet  tibi  Iehova  e  Sion,  et  videbis  bonum  Ierusalem  omnibus  diebus  vitae  tuae.  6.  Et  videbis  filios  filiorum  tuorum^  pacem  super  Israel.  4.  (Ecce  certe  sic.)  Confirmat  propheta  superiorem  doctrinam,  in  externo  quoque  fluxae  huius  vitae  statu  fulgere  Dei  gratiam,  quae  demonstret  nos  operam  non  perdere  eum  colendo.  Quia  tamen  non  tam  clare  apparet  pietatis  merces,  primo  demonstrativa  particula  utitur,  ecce:  deinde  addit  certe,  sic  enim  interpretor  particulam  vj.  Semper  tamen  memoria  tenendum  est  quod  prius  attigi,  sic  promitti  I  nobis  in  terra  Dei  benedictionem,  ne  sensus  nostros