25:328  23,  Quod  si  non  feceritis.  Contestatur  solenni  ritu  impie  acturos  si  fidem  datam  fallant:  et  simul  poenam  denunciat,  ac  si  eos  citaret  reos  ad  Dei  tribunal.  Etsi  autem  hypothetice  loquitur  de  una  illa  pactione,  qua  se  ultro  duae  tribus  astrinxerant,  generalis  tamen  doctrina  inde  pendet,  nisi  stemus  promissis,  Deum  semper  fraudis  et  perfidiae  fore  ultorem.  Ac  magis  emphatica  loquutio  est:  Peccatum  vos  apprehendet,  quam  si  dixisset:  Non  effugietis  Dei  manum.  Sensus  enim  est,  peccato  sic  affixam  esse  vindictam,  ut  avelli  nequeat:  sicuti  Genesis  quarto  dicitur,  peccatum  excubare  pro  foribus,  ut  noxios  tandem  corripiat.  Nam,  quae  nostra  est  ad  peccandum  proclivitas,  nimis  experimur  tolerantia  Dei  nos  animari  ad  audaciam,  dum  nos  putamus  elapsos  esse,  si  ad  tempus  dissimulet.  EX  EODEM  CAPITE.  28.  Et  praecepit  de  eis  Moses  ipsi  Eleazar  sacerdoti,  et  Iosue  filio  Nun,  et  principibus  patrum  tribuum  filiorum  Israel.  29.  Et  dixit  illis:  Si  transierint  filii  Gad  et  filii  Ruben  vobiscum  Iordanem,  omnes  accincti  armis  ad  bellum  coram  Iehova,  et  subiecta  fuerit  terra  coram  vobis,  dabitis  eis  terram  Galaad  in  possessionem:  30.  Quod  si  non  transierint  accincti-armis  vobiscum,  tum  possessionem  habebunt  in  medio  vestri  in  terra  Chenaan.  31.  Et  responderunt  filii  Gad  et  Ruben,  dicendo:  Quod  dixit  Iehova  servis  tuis,  sic  faciemus.  32.  Nos  transibimus  accincti  armis  coram  Iehova  in  terram  Chenaan,  ut  vobiscum  sit  possessio  haereditatis  nostrae  citra  Iordanem.  33.  Dedit  itaque  illis  Moses,  filiis  Gad,  et  filiis  Ruben,  et  dimidiae  tribui  Manasse  filii  Ioseph,  regnum  Sihon  regis  Amorrhaei,  et  regnum  Og  regis  Basan,  terram  cum  urbibus  suis,  cum  terminis,  urbes  terrae  per  circuitum.  34.  Et  aedificaverunt  filii  Gad  Dibon,  et  Ataroth,  et  Aroer:  35.  Et  Atroth,  Sopham,  et  Iaazer,  et  Iogbehal:  36.  Et  Bet-nimrah,  et  Bet-haran,  urbes  munitas  et  caulas  ovium.  37.  Filii  vero  Ruben  aedificaverunt  Hesbon,  et  Eleale,  et  Ciriathaim:  38.  Et  Nebo,  et  Baal-meon  versis  nominibus,  et  Sibmah:  et  vocaverunt  nominibus  nomma  urbium  quas  aedificaverant.  39.  Perrexerunt  autem  filii  Machir,  filii  Manasse  in  Galaad,  acceperuntque  eam,  et  expulerunt  Amorrhaeum  qui  erat  in  ea.  40.  Itaque  dedit  Moses  Galaad  ipsi  Machir  filio  Manasse,  et  habitavit  in  ea.  41.  Iair  praeterea  filius  Manasse  profectus  erat,  et  acceperat  vicos  eorum,  et  vocavit  eos  Havoth-Iair.  42.  Nobah  similiter  profectus  erat,  et  ceperat  Cenah  et  villas  eius:  vocavitque  eam  Nobah  secundum  nomen  suum.