20:328  4125.  RADZIVIL1U8  CALVINO.  Pertinet  ad  controversiam  de  trinitate.  (Ex  autographo  Arch.  Turic.  Plut.  VI.  Vol.  106,  olim  Epp.  II.  971  ss.  -  Simler.  Vol.  110.)  Clarissime  idemque  ornatissime  vir,  amice  noster  plurimum  carissime  et  observandi  ssime.  Non  dubitamus  te  virum  sapientem  moveri  orbis  terrarum  contentionibus  ac  vero  potissimum  pro  tua  eximia  et  excellenti  pietate  prosequi  gemitibus  inenarrabilibus  dissidia  religionis,  tum  dissipationes  distractionesque  Ecclesiarum  ac  docentium  in  Ecclesia  Dei.  Ac  eadem  ipsa  caussa  nos  impulit  ad  te  hoc  tempore  scribere,  qui  in  tantis  doctrinae  et  opinionum  procellis,  iudicium,  consilium  et  opem  tuam  nobis  magnopere  necessariam  esse  statuimus,  ad  teque  hominem  alioquin  pientissimum,  nobis  vero  amicissimum,  pro  fideli  et  salutari  consilio  in  rebus  magni  in  religione  momenti  confugimus.  Nolumus  enim  te  celare,  exarsisse  non  ita  pridem  graves  et  cumprimis  arduas  controversias  in  Regno  Poloniae,  et  in  magno  Ducatu  Lithuaniae,  ac  in  ceteris  provintiis  et  ducatibus  Serenissimi  Regis  nostri  Sigismundi  Augusti,  de  primario  fidei  nostrae  fundamento:  Et  quidem  exarsisse  non  inter  Papistas,  sed  inter  nos,  qui  Iesu  Christo  unico  liberatori  et  assertori  salutis  nostrae  nomina  dedimus,  quique  Antichristi  catarmata  Divina  gratia  affluente  a  nobis  reiicimus,  hoc  est,  inter  ipsosmet  Evangelicos,  qui  hactenus  magno  consensu  sequuti  sumus  et  sequimur  per  totam  Poloniam  et  Lithuaniam  confessionem  et  consensum  Ecclesiarum  vestrarum  per  Helvetiam  et  Allobroges.  Alii  sunt  qui  in  articulo  fidei  de  Trinitate,  tametsi  non  rem  ipsam,  sed  nomina  illa  usitata  Dei,  Trinitatis,  Dei  Essentiae,  Dei  unius  qui  se  in  Patre  et  Filio  et  Spiritu  sancto  patefecit,  aut  in  tribus  Personis  revelavit,  Item:  Unus  Deus  Trinitas,  Unus  Deus  in  Trinitate,  Unus  Deus  trinus,  Tres  Personae  in  una  Essentia,  una  Essentia  in  tribus  Personis,  et  id  genus,  prorsus  tanquam  humana  inventa  reiiciunt,  et  soli  expresso  Verbo  Dei  in  hac  parte  standum  esse  statuunt,  et  symbolis  Apostolico  et  Nicaeno.  In  Athanasii  vero  pleraque  reiiciunt.  Dicunt  enim  Deum  Trinum  unum,  et  unum  trinum  nihil  aliud  esse,  quam  merum  Sabellianismum.  Quod  videlicet  verbis  tantum  concedant  illi  realem  existentiam  ac  distinctionem  Patris,  Filii  et  Spiritus  Sancti.  Re  ipsa  tamen  confusionem  Sabellii  inducunt.  Ac  prodierunt  non  ita  pridem  iudicia  Ecclesiarum  Tigurinae  et  Heidelbergensis  de  hac  ipsa  con-