5:327  CATECHISMUS.  afflictis  et  perculsis  ultro  se  profert:  ac  nos,  quibus  gradibus  expedire  imbecillitati  nostrae  novit,  ab  errore  in  viam  rectam,  a  morte  in  vitam,  a  ruina  in  salutem,  a  regno  diaboli  in  regnum  suum  revocat.  Quum  igitur  Dominus,  quos  in  vitae  coelestis  haereditatem  restituere  dignatur,  iis  omnibus  primum  hunc  gradum  statuat,  ut  peccatorum  suorum  [pag.  7]  conscientia  vulnerati  et  pondere  fatigati,  ad  ipsius  timorem  excitentur,  legem  nobis  primum  suam  proponit,  quae  ad  eam  cognitionem  nos  exerceat.  DE  LEGE  DOMINI.  In  lege  Dei  perfectissima  totius  iustitiae  regula  traditur,  quam,  optima  ratione  aeternam  Domini  voluntatem  appellare  licet.  Nam  illic  duabus  tabulis  quidquid  a  nobis  requirit,  ad  plenum  et  liquidum  complexus  est.  Priore,  quis  sibi  maiestatis  suae  cultus  probetur:  altera,  quae  caritatis  officia  proximo  debeantur,  paucis  mandatis  praescripsit.  Eam  ergo  audiamus:  tum  postea,  quid  ex  ea  doctrinae  capiendum,  simul  quid  fructus  colligendum  sit  nobis,  videbimus.  EXODI  XX.  EGO  sum  dominus  Deus  tuus,  qui  eduxi  te  de  terra  Aegypti  de  domo  servitutis.  Non  habebis  Deos  alienos  coram  facie  mea.  Pars  huius  praecepti  vice  est  praefationis  in  totam  legem.  Nam  dum  se  dominum  Deum  nostrum  esse  pronunciat,  eum  se  esse  innuit,  qui  ius  habeat  praecipiendi,  et  cuius  praeceptis  obedientia  debeatur.  Quemadmodum  per  prophetam  (Mal.  1,  6)  suum  ait:  si  ego  pater,  ubi  amor?  Si  dominus  ubi  timor?  simul  beneficium  commemorat,  quo  nostra  ingratitudo  arguatur,  nisi  eius  voci  auscultamus.  Qua  enim  benignitate  iudaicum  populum  semel  ex  Aegypti  [pag.  8]  servitute  vindicavit,  eadem  quoque  servos  suos  omnes  e  perpetua  fidelium  Aegypto,  hoc  est,  e  peccati  potestate  liberat.  Quod  autem  deos  alienos  habere  vetat,  significat,  ne,  quod  Dei  proprium  est,  alteri  quam  sibi  deferamus:  et  addit,  coram  facie  sua:  quo  non  externa  modo  confessione  Deum  se  agnosci,  sed  intimi  cordis  veritate  haberi  velle,  declaret.  Haec  autem  Dei  unius  propria  sunt,  quae  sine  sacrilegio  transferri  alio  nequeant:  ut  solum  ipsum  adoremus,  in  ipsum  tota  fiducia  speque  recumbamus,  ipsi,  quidquid  usquam  bonum  sanctumque  est,  acceptum  feramus,  omnisque  bonitatib  ac  sanctitatis  laudem  ad  ipsum  referamus.