32:327  327  PSALMUS  CXXVIII.  328  minore  fastu  quam  impudentia  et  ludibrio  timorem  Dei  iactent.  Itaque  propheta  probationem  in  vita  exigit,  quia  res  sunt  individuae  timor  Dei  et  legis  observatio:  atque  ex  radice  necesse  est  prodire  fructus.  Colligimus  praeterea  ex  hoc  loco,  non  aliter  probari  Deo  vitam  nostram  nisi  dum  ad  legem  eius  formatur.  Certe  nulla  est  sine  timore  Dei  religio.  Ex  illo  autem  propheta  deducit  quod  dixi,  ut  vivamus  ad  eius  praescriptum  et  mandatum.  2.  {Laborem  manuum  tuarum,)  Quidam  male  (meo  iudicio)  sententiam  hanc  discerpunt,  seorsum  legentes,  Quia  laborem  manuum  tuarum  manducabis:  deinde,  Beatus  eris,  et  bene  tibi  erit:  ut  hoc  posterius  membrum  sit  initium  novae  sententiae.  Equidem  verum  esse  fateor  quod  afferunt,  hanc  Dei  gratiam,  quod  fideles  labore  suo  fruentur,  opponi  maledictioni  quam  scimus  toti  generi  humano  fuisse  inflictam.  Sed  optime  sensus  fluet,  si  uno  contextu  legamus,  beatos  esse  filios  Dei  laborem  suum  comedendo,  alioqui  frigida  esset  adeoque  insulsa  repetitio.  Iam  vero  propheta  priorem  doctrinam  confirmans,  breviter  admonet  secus  aestimandam  felicitatem  esse  quam  facere  soleat  mundus,  qui  beatam  vitam  in  otio,  deliciis,  honoribus  et  opum  abundantia  locat.  Hic  autem  servos  Dei  ad  mediocritatem  revocat  propheta,  quae  fere  ab  omnibus  respuitur.  Quotus  quisque  enim,  si  detur  optio,  ex  suo  labore  vivere  appetet?  imo  quis  pro  singulari  bono  ducet?  Simul  ac  in  medium  prodit  felicitatis  nomen,  ut  inexplebilis  gurges  est  hominis  cupiditas,  statim  quisque  ad  intemperiem  erumpit.  Ergo  propheta  hoc  uno  contentos  esse  iubet,  quod  sub  Deo  nutritio  commode  labore  manuum  suarum  alen  tur,  sicut  dictum  fuit  Psalmo  34,  11:  Leones  esuriunt  et  sunt  famelici:  qui  vero  Deum  inquirunt,  eos  nihil  boni  deficiet.  Meminerimus  autem,  prophetam  non  de  ultima  felicitate  loqui,  quae  nec  cibo  vel  potu  constat,  nec  angustis  caducae  vitae  finibus  inclusa  est:  sed  promittere  etiam  in  hac  peregrinatione  vel  terreno  hospitio  fidelibus  felicem  vitam  quatenus  patitur  mundi  conditio:  quemadmodum  dicit  Paulus,  pietati  utrumque  promitti,  ut  scilicet  Deus  toto  vitae  curriculo  nostri  curam  gerat  (1.  Tim.  4,  8)  donec  ad  aeternam  gloriam  tandem  nos  perducat.  Valet  etiam  ad  emphasim  personae  mutatio:  quia  in  tertia  persona  loquutus,  sermonem  ad  singulos  dirigit,  hoc  sensu,  Non  tantum  immortalis  felicitas  in  coelo  te  manet,  sed  quantisper  in  mundo  peregrinaris,  Deus  officium  patrisfamilias  praestare  non  desinet  in  te  educando,  ut  tibi  quotidianus  victus  suppetat  ex  eius  manu,  modo  tenui  sorte  contentus  sis.  3.  (Uxor  tua  sicut  vitis.)  Iterum  hic  describitur  benedictio  Dei  sub  specie  illa  cuius  proxime  meminit  Solomo,  nempe  quod  Deus  foecundos  reddet  suos  cultores,  ut  numerosam  sobolem  generent.