41:326  enclos  au  temple,  mais  cependant  il  y  declaroit  sa  vertu,  et  de  fait,  le  temple  estoit  dedie  par  sa  parole,  et  voila  comme  toutes  ces  choses  representoient  la  maieste  de  Dieu,  c'est  a  dire,  quand  il  estoit  la  adore,  qu'il  y  avoit  ordonne  un  service  pour  dire:  Ie  veux  estre  la  servi.  Alors  c'estoit  une  consecration,  qui  estoit  faite,  qui  devoit  demourer  inviolable,  ainsi  en  estoit-il  des  vaisseaus  du  temple,  que  Dieu  avoit  ordonnes  au  service,  qui  estoit  la  fait:  Et  vouloit  que  le  peuple  s'y  exercast  iusques  a  la  venue  de  nostre  Seigneur  Iesus  Christ,  il  falloit  donc  que  ces  choses  la  eussent  une  marque  de  la  maieste  de  Dieu,  qu'ils  fussent  comme  tesmoignage  des  Sacremens,  ausquels  Dieu  vouloit  estre  conneu:  maintenant  donc  quand  Balsazar  envoye  querir  les  vaisseaus  du  temple,  il  s'adresse  a  Dieu,  auquel  il  scavoit  ces  vaisseaus  la  avoir  este  dedies.  Nous  voions  maintenant  comme  Balsazar  ha  despite  Dieu  en  double  sorte,  c'est  a  scavoir,  par  son  arrogance  quand  il  veut  faire  ses  triomphes  du  Dieu  vivant,  et  puis  apres  quand  il  renverse  ce  qui  avoit  este  commande,  par  la  Loy  de  Dieu,  qu'il  falloit  que  ce  service  du  temple  de  Ierusalem  demeurast  iusques  a  la  venue  de  nostre  Seigneur  Iesus  Christ.  Ainsi  donc  ne  trouvons  pas  estrange  que  la  punition  vienne  quant  et  quant,  telle  que  nous  la  verrons  cy  apres.  Or  les  papistes  reprochent  auiourd'hui  a  ceux  qui  ont  prophane  les  vaisseaus  de  leurs  temples,  qu'ils  sont  semblables  a  Balsazar,  mais  il  s'en  faut  beaucoup,  car  ie  demande,  quelle  est  la  consecration  de  tous  les  calices  des  papistes,  de  leurs  ioiaus,  habits,  et  de  tout  leur  bagage?  Il  est  bien  vray  qu'ils  auront  beaucoup  d'agios,  qu'il  faudra  qu'un  Evesque  soit  mitre,  qu'il  soit  en  son  pontificat  (comme  ils  le  nomment)  pour  dedier  un  calice,  une  chasuble,  et  tout  le  reste  de  leur  mesnage,  mais  en  quelle  autorite?  Dieu  en  ha  il  commande  un  seul  mot?  Dieu  l'avoit  commande  soubs  la  Loy  de  Moyse:  Et  ce  n'estoient  qu'umbres  bien  obscures,  mais  nous  avons  la  substance  en  Iesus  Christ  (comme  dit  Sainct  Paul),  II  ne  se  faut  donc  plus  arrester  a  ces  umbres,  qui  ont  dure  du  temps  de  la  Loy,  depuis  que  Iesus  Christ  ha  este  declare  au  monde:  Ainsi  donc  il  nous  faut  separer  le  regime  de  l'Eglise,  tel  qu'il  est  auiourd'hui  de  celuy  qui  estoit  soubs  la  Loy:  car  le  service  de  Dieu  est  auiourd'huy  spirituel,  et  n'avons  plus  besoin  des  ceremonies  anciennes  de  la  Loy.  Que  font  donc  les  Papistes  quand  ils  pensent  encores  auiourd'huy  consacrer  leurs  calices,  leurs  chasubles,  et  tout  le  reste  de  leurs  utenciles,  quelle  dedicace  est-ce  qu'ils  en  font?  un  charme  comme  un  Sorcier,  qui  fera  ses  exorcismes  et  coniurations.  Voila  un  Item.  Et  puis  regardons  quelle  est  la  fin  de  tout  ce  qu'ils  auront  ainsi  consacre,  sinon  a  ce  que  Dieu  soit  21*