32:326  PSALMUS  CXXVIII.  ARG.  Psalmus  hic  proximo  affinis  est,  et  quaedam  veluti  appendix.  Nam  Dei  benedictionem,  quam  Solomo  testatus  est  diffundi  per  totum  humanum  genus,  in  yeris  et  sinceris  eius  cultoribus  maxime  illustrem  esse  praedicat.  Canticum  graduum,  1.  Beatus  vir  timens  Iehovam,  ambulans  in  viis  eius.  2.  Laborem  manuum  tuarum  dum  comedes  beatus  eris,  et  bene  erit  tibi.  3.  Uxor  tua  sicut  vitis  fructifera  in  lateribus  domus  tuae:  filii  tui  sicut  plantae  olivarum  in  circuitu  mensae  tuae.  1.  (Beatus  vir.)  Quia  proximo  Psalmo  dictum  est  prosperum  in  omnibus  negotiis  totoque  vitae  decursu  eventum  a  sola  Dei  gratia  sperandum  esse,  nunc  admonet  propheta  ut  qui  cupiunt  benedictionis  Dei  esse  participes,  sincere  totos  ei  se  addicant,  quia  cultores  suos  nunquam  frustrabitur.  Ac  primus  quidem  versus  summam  continet,  nam  reliqui  tantum  explicationis  vice  additi  sunt.  Est  autem  hoc  paradoxon,  cui  vix  centesimus  quisque  subscribet,  beatos  esse  qui  timent  Deum,  praesertim  in  hac  vita.  Multi  enim  Epicurei  passim  volitant  Dionysio  similes,  qui  in  secunda  navigatione  iactabat  deos  favere  sacrilegis.  Infirmos  etiam  turbat  et  concutit  malorum  felicitas.  Deinde  sub  aerumnis  suis  fatiscunt,  atque  ut  non  bene  sit  Dei  contemptoribus,  et  tolerabilis  sit  bonorum  conditio,  maior  tamen  pars  in  reputanda  Dei  providentia  vel  caecutit  vel  connivet.  Certe  dicterium  hoc  pridem  communi  fere  omnium  consensu  receptum  fuit,  Optimum  esse  non  nasci,  proximum  quam  citissime  aboleri.  Denique  vel  totum  humanum  genus  promiscue  miserum  esse  existimat  sensus  carnis:  vel  profanis  et  sceleratis  hominibus  magis  propitiam  esse  fortunam  quam  bonis.  Ab  hac  autem  sententia,  ut  fuse  disserui  Psalmo  37,  penitus  abhorret,  beatos  esse  qui  timent  Dominum,  quo  magis  in  eius  meditatione  nos  insistere  convenit.  Caeterum  quia  obscura  est  haec  felicitas,  ut  eam  capere  possimus,  primo  tenenda  est  eius  definitio  quae  mox  sequetur.  Deinde  sciendum  est,  a  Dei  protectione  maxime  pendere.  Nam  ut  in  acervum  congerat  quaecunque  ad  beatam  vitam  facere  videntur,  nihil  certe  magis  erit  optabile  quam  delitescere  sub  Dei  praesidio.  Quod  si  bonum  hoc,  ut  meretur,  nostro  iudicio  reliquis  omnibus  praecellit,  quisquis  persuasus  erit  Deo  mundum  et  res  humanas  curae  esse,  simul  haud  dubie  statuet  summum  felicitatis  caput  esse  quod  hic  ponitur.  Sed  antequam  ultra  progrediar,  notandum  est,  in  secunda  parte  versus  non  abs  re  notam  apponi  quae  Dei  cultores  a  contemptoribus  discernit.  Videmus  ut  improbissimi  quique  noa  21*