1:326  Haec  ergo  documenta  testantur,  universalem  rationis  et  intelligentiae  comprehensionem  esse  hominibus  naturaliter  inditam.  Sic  tamen  universale  est  bonum,  ut  in  eo  pro  se  quisque  peculiarem  Dei  gratiam  agnoscere  debeat.  Ad  quam  gratitudinem  nos  abunde  expergefacit  Dominus,  dum  moriones  creat,  in  quibus  repraesentat  quibus  excellat  dotibus  hominis  anima,  nisi  eius  lumine  perfusa;  quod  sic  naturale  inest  omnibus,  ut  gratuitum  sit  erga  singulos  beneficentiae  eius  munus.  Ipsarum  porro  artium  aut  inventio,  aut  methodica  traditio,  aut  interior  et  praestantior  cognitio,  quae  propria  est  paucorum,  non  est  quidem  solidum  argumentum  communis  perspicaciae;  quia  tamen  promiscue  contingit  piis  et  impiis,  iure  inter  naturales  dotes  numeratur.  35.  Quoties  ergo  in  profanos  scriptores  incidimus,  illa,  quae  admirabilis  in  iis  affulget,  veritatis  luce  admoneamur,  naturam  hominis,  quantumlibet  ab  integritate  sua  collapsam  et  perversam,  eximiis  tamen  etiamnum  Dei  donis  vestitam  esse  et  exornatam.  Si  unicum  veritatis  fontem  Dei  spiritum  esse  reputamus,  veritatem  ipsam  neque  respuemus  neque  contemnemus,  ubicunque  apparebit,  nisi  velimus  in  spiritum  Dei  contumeliosi  esse;  non  enim  dona  spiritus,  sine  ipsius  contemptu  et  opprobrio,  vili  penduntur.  Quid  autem?  Veritatem  affulsisse  antiquis  iureconsultis  negabimus,  qui  tanta  aequitate  civilem  ordinem  et  disciplinam  prodiderunt?  Philosophos  caecutisse  dicemus,  cum  in  exquisita  ista  naturae  contemplatione,  tum  artificiosa  descriptione?  Dicemus  mentem  illis  defuisse,  qui,  arte  disserendi  constituta,  nos  cum  ratione  loqui  docuerunt?  Dicemus  eos  insanisse,  qui  medicinam  excudendo  suam  industriam  nobis  impenderunt?  Quid  mathemata  omnia?  putabimusne  amentium  deliria?  Imo  ne  sine  ingenti  quidem  admiratione  veterum  scripta  legere  de  his  rebus  poterimus;  admirabimur  autem  quia  praeclara,  ut  sunt,  cogemur  agnoscere.  Porro  laudabilene  aliquid  aut  praeclarum  censebimus,  quod  non  recognoscamus  a  Deo  provenire?  Pudeat  nos  tantae  ingratitudinis,  in  quam  non  inciderunt  ethnici  poetae,  qui  et  philosophiam  et  leges  et  bonas  omnes  artes  deorum  inventa  esse  confessi  sunt.  Ergo  quum  homines  istos,  quos  scriptura  Ψυχιϰοὺς  vocat,  usque  eo  fuisse  pateat  in  rerum  inferiorum  investigatione  acutos  et  perspicaces,  talibus  exemplis  discamus,  quot  naturae  humanae  bona  Dominus  reliquerit,  postquam  vero  bono  spoliata  est.  36.  Neque  tamen  interim  obliviscamur  haec  praestantissima  divini  spiritus  esse  bona,  quae  in  publicum  generis  humani  bonum,  quibus  vult,  dispensat.  Si  enim  Beseleel  et  Oliab  intelligentiam  et  scientiam,  quae  ad  fabricam  tabernaculi  requirebatur,  oportuit  a  spiritu  Dei  instillari  (Exod.  31,  2  et  35,  30):  non  mirum  est  si  earum  rerum,  quae  sunt  21*