5:325  CATECHISMUS.  tam  molem  et  condiderit,  et  nunc  sustentet;  sapientiam,  quae  tantam  ac  tam  confusam  varietatem  ordine  tam  distincto  composuerit  et  perpetuo  moderetur;  bonitatem,  quae  ipsa  sibi  causa  fuerit  ut  haec  crearentur  et  nunc  consistant;  iustitiam,  quae  in  defensione  piorum,  impiorum  vero  ultione  mirifice  se  profert;  misericordiam,  quae  ad  resipiscentiam  quo  nos  vocet,  nostras  iniquitates  tanta  mansuetudine  tolerat.  Hinc  quidem  abunde,  quantum  nobis  satis  est,  doceri  debueramus,  qualis  sit  Deus,  nisi  ad  tantam  lucem  nostra  hebetudo  caecutiret.  Neque  sola  tamen  caecitate  hic  peccamus:  sed  ea  nostra  est  perversitas,  quae  in  censendis  Dei  operibus  nihil  non  perperam  ac  praepostere  interpretetur,  totamque  coelestem  sapientiam,  quae  in  iis  perspicue  relucet,  prorsus  invertat.  Veniendum  ergo  ad  Dei  verbum,  ubi  probe  nobis  a  suis  operibus  describitur  Deus:  dum  opera  ipsa  non  ex  iudicii  nostri  pravitate,  sed  aeternae  veritatis  [pag.  4]  regula  aestimantur.  Hinc  ergo  discimus,  Deum  nostrum  unum  atque  aeternum  omnis  vitae,  iustitiae,  sapientiae,  virtutis,  bonitatis,  clementiae  fontem  esse:  a  quo  ut  sine  ulla  exceptione  fluit  omne  bonum,  ita  laus  omnis  merito  redire  ad  eum  debeat.  Atque  istae  quidem  omnia  tametsi  in  singulis  coeli  ac  terrae  partibus  lucidissime  appareant:  quorsum  tamen  potissimum  spectent,  quid  valeant,  quem  in  finem  a  nobis  sint  intelligenda,  tum  demum  assequimur,  dum  in  nos  ipsos  descendimus,  ac  consideramus  quibus  modis  suam  in  nobis  vitam,  sapientiam,  virtutem,  Dominus  exserat:  suam  iustitiam,  bonitatem,  clementiam  erga  nos  exerceat.  DE  HOMINE.  Homo  primum  ad  imaginem  et  similitudinem  Dei  formatus  fuit,  ut  in  suis  ornamentis,  quibus  a  Deo  splendide  vestitus  erat,  eorum  autorem  suspiceret,  et  qua  decebat  gratitudine  veneraretur.  Verum  quoniam  tanta  naturae  suae  excellentia  confisus,  scilicet  oblitus  undo  et  profecta  esset  et  subsisteret,  efferre  se  extra  Dominum  conatus  est:  omnibus  Dei  beneficiis,  quibus  stolide  superbiebat,  spoliari  ipsum  opportuit:  ut  Deum,  quem  beneficentia  eius  dives  contemnere  ausus  erat,  omni  gloria  nudus  ac  destitutus  agnosceret.  Quam  ob  rem  quicunque  ex  semine  Adae  originem  ducimus,  obliterata  Dei  similitudine,  caro  ex  carne  nascimur.  Nam  quamvis  anima  constemus  et  corpore,  nil  tamen  nisi  carnem  sapimus.  Ut  in  quamcunque  hominis  partem  vertamus  oculos,  nihil  nisi  impurum,  profanum,  ac  Deo  abominabile  spectare  liceat.  Prudentia  enim  eius  caeca,  [pag.  5]  et  infinitis  erroribus  involuta.  Dei  sapientiae  semper  adversatur.  Voluntas  prava,  corruptisque  affectibus  referta,  nil  magis  odit  quam  illius  iustitiam.  Vires  ad  bonum  omne  opus  enervatae,  ad  iniquitatem  furiose  ruunt.