1:325  CAP.  II.  DE  COGNITIONE  HOMINIS.  A29;B27,  C  27.]  Res  terrenas  voco,  quae  ad  Deum  regnumque  eius,  ad  veram  iustitiam,  ad  futurae  vitae  immortalitatem  non  pertingunt,  sed  cum  vita  praesenti  rationem  relationemque  habent  et  quodammodo  intra  eius  fines  continentur.  Res  coelestes,  verae  iustitiae  rationem  ac  regni  coelestis  mysteria.  In  priore  genere  sunt  politia,  oeconomia,  artes  omnes  mechanicae  disciplinaeque  liberales.  In  secundo  Dei  ac  divinae  voluntatis  cognitio  et  vitae  secundum  eam  formandae  regula.  De  priori  autem  sic  fatendum:  quoniam  homo  animal  est  natura  sociale,  naturali  quoque  instinctu  ad  fovendam  conservandamque  eam  societatem  propendet;  ideoque  civilis  cuiusdam  et  honestatis  et  ordinis  universales  impressiones  inesse  omnium  hominum  animis  conspicimus.  Hinc  fit,  ut  nemo  reperiatur  qui  non  intelligat,  oportere  quosvis  hominum  coetus  legibus  contineri,  quique  non  earum  legum  principia  mente  complectatur.  Hinc  ille  perpetuus  tam  gentium  omnium  quam  singulorum  mortalium  in  leges  consensus,  quia  insita  sunt  universis,  absque  magistro  aut  legislatore,  ipsarum  semina.  33.  Neque  moror  dissensiones  et  pugnas  quae  mox  emergunt,  dum  alii  cupiunt,  ius  et  fas  omne  inversum,  soluta  legum  repagula,  libidinem  solam  pro  iure  grassari,  ut  fures  et  latrones;  alii  (quod  vitium  plusquam  vulgare  est)  iniquum  esse  putant,  quod  pro  aequo  ab  aliis  sancitur,  contra  laudabile  contendunt  quod  ab  aliis  vetatur.  Siquidem  illi  non  ideo  leges  oderunt,  quod  ignorent  bonas  et  sanctas  esse,  sed  praecipiti  cupiditate  furentes  cum  manifesta  ratione  pugnant,  et  quod  mentis  intelligentia  probant,  pro  sua  libidine  abominantur.  Posterius  certamen  tale  est,  ut  primam  illam  conceptionem  aequitatis  non  dirimat.  Siquidem  de  legum  capitibus  dum  inter  se  disceptant  homines,  in  quandam  aequitatis  summam  consentiunt.  In  quo  debilitas  certe  humanae  mentis  arguitur,  quae,  etiam  dum  viam  sequi  videtur,  claudicat  et  vacillat.  Manet  tamen  illud,  inspersum  esse  universis  semen  aliquod  ordinis  politici.  Atque  hoc  amplum  argumentum  est,  in  huius  vitae  constitutione  nullum  destitui  luce  rationis  hominem.  34.  Sequuntur  artes  tum  liberales,  tum  manuariae,  quibus  discendis,  quia  inest  omnibus  nobis  quaedam  aptitudo,  in  eis  etiam  apparet  vis  humani  acuminis.  Quanquam  autem  non  sunt  omnes  omnibus  discendis  idonei,  satis  tamen  communis  energiae  certum  specimen  est,  quod  nemo  reperitur  cuius  in  arte  aliqua  perspicientia  non  se  exserat.  Neque  sola  suppetit  ad  discendum  energia  et  facilitas;  sed  ad  excogitandum  in  unaquaque  arte  novum  aliquid,  vel  amplificandum  et  expoliendum,  quod  alio  praeeunte  didiceris.  Quod  ut  Platonem  perperam  impulit  ut  traderet  comprehensionem  eiusmodi  nihil  esse  quam  recordationem,  ita  nos  optima  ratione  cogit  fateri,  esse  ingenitum  humano  ingenio  eius  principium.