52:324  profectus  nullus  apparet,  nullaque  aedificatio,  iam  a  Christi  instituto  disceditur.  Quum  autem  non  de  professis  impiorum  dogmatum  autoribus  loquatur  Paulus,  sed  de  vanis  doctoribus  ac  profanis,  qui  ambitione  sua  vel  avaritia  simplicem  et  genuinam  pietatis  doctrinam  deformant:  videmus  tamen  quam  acriter  ac  severe  invehatur  adversus  eos:  nec  mirum.  Dici  enim  vix  potest  quantum  noceat  fucosa,  et  prorsus  ad  ostentationem  et  inanem  pompam  composita  praedicatio.  Verum  quos  perstringat,  melius  patet  ex  contextu.  Nam  quod  proxime  sequitur,  nec  acquiescit  sanis  sermonibus,  exegeticum  est.  Fieri  enim  solet  ut  eiusmodi  homines  praepostera  curiositate  abrepti,  quidquid  utile  est  ac  solidum,  despiciant.  Itaque  instar  petulantium  equorum,  sine  ratione  lasciviunt.  Id  vero  quid  aliud  est  quam  respuere  sanos  Christi  sermones?  Nam  sani  vocantur  ab  effectu,  quia  sanitatem  nobis  conferant,  vel  apti  sint  ad  eam  fovendam.  Idem  significat  d  o  c  t  r  i  n  a  quae  secundum  p  i  e  t  a  t  em  est.  Neque  enim  pietati  consentanea  erit,  nisi  in  timore  cultuque  Dei  nos  instituat,  nisi  fidem  nostram  aedificet,  nisi  ad  patientiam,  humilitatem,  omnia  caritatis  officia  nos  erudiat.  Ergo  quisquis  utiliter  docere  non  studet,  secus  docet  quam  oportebat:  imo  nec  pia,  nec  sana  est  doctrina,  quocunque  colore  fulgeat,  quae  ad  profectum  audientium  non  tendit.  Tales  primum  superbiae  damnat  Paulus,  et  quidem  inanis  et  ventosae  :  deinde  quia  nulla  excogitari  potest  aptior  ad  castigandos  ambitiosos  poena,  quam  dum  inscitiae  damnatur  totum  id  quo  sibi  placent:  Paulus  eos  n  i  h  i  l  scire  pronuntiat,  utcunque  multis  argutiis  turgeant.  Nihil  enim  habent  solidum,  sed  meros  tantum  flatus.  Et  simul  pios  omnes  admonet,  ne  se  ventosa  ista  ostentatione  efferri  patiantur  quominus  in  evangelii  simplicitate  defixi  maneant.  4.  Sed  languens.  Est  obliqua  antithesis  inter  sanitatem  doctrinae  Christi  ac  languorem  istum.  Nam  quum  multum  diuque  se  fatigaverint  subtiles  isti  quaestionarii  :  quem  tandem  fructum  reportant  ex  suo  labore,  nisi  quod  subinde  crescit  morbus?  Ita  non  frustra  tantum  se  macerant:  sed  languorem  contrahunt  ex  perversa  sua  curiositate.  Sequitur  ergo  longe  abesse  ut  rite  proficiant,  quemadmodum  oportebat  Christi  discipulos.  Quaestiones  et  v  e  r  b  o  r  um  pugnas  non  abs  re  simul  coniungit:  priore  enim  vocabulo  non  quasvis  quaestiones  significat,  quae  vel  ex  sobrio  moderatoque  discendi  studio  nascuntur,  vel  ad  puram  rerum  utilium  explicationem  faciunt:  sed  quales  hodie  in  Sorbonicis  scholis  agitantur  ad  ostentandum  acumen.  Illic  quaestio  quaestionem  parit:  quia  nullus  est  modus,  ubi  quispiam  plus  scire  quam  expediat  appetens,  suae  vanitati  indulget.  Hinc  postea  emergunt  infinitae  rixae.  Quemadmodum  enim  crassae  in  calore  nubes  non  sine  tonitru  discutiuntur:  ita  necesse  est  ut  spino-