50:324  Voila  donc  comme  chacun  doit  estre  prepare,  si  nous  voulons  estre  bons  escholiers  du  Fils  de  Dieu,  et  luy  attribuer  la  maistrise  qui  luy  appartient.  Et  d'autant  plus  devons  nous  travailler  a  cela,  quand  nous  voyons  que  nostre  nature  nous  pousse  tout  au  contraire:  car  nous  sommes  aveuglez  de  l'amour  de  nous  mesmes:  chacun  appete  d'estre  honore:  or  nous  ne  le  pouvons  estre,  sinon  par  flatteries  et  mensonges.  Car  qui  a-il  en  nous  qui  doive  estre  prise?  Il  n'y  a  que  puantise  et  infection  devant  Dieu.  Car  toutes  les  plus  belles  vertus  que  nous  ayons  en  apparence,  ne  seront  que  corruption  iusques  a  ce  que  Dieu  noue  ait  reformez.  Ainsi  tout  ce  que  nous  avons  de  nostre  nature,  il  est  certain  qu'il  faut  qu'il  soit  purge:  ou  autrement  nous  pourririons  ainsi  en  nos  pouretez.  Et  ainsi  d'autant  qu'il  n'y  a  autre  moyen  de  nous  attirer  a  salut,  sinon  que  nous  soyons  purgez  de  tous  nos  vices,  et  que  ceste  purge-la  ne  se  puisse  faire  sinon  par  violence,  quand  nous  serons  admonnestez  par  la  doctrine  de  l'Evangile,  que  nos  consciences  nous  redargueront,  encores  que  nous  appetions  quelquefois  qu'on  nous  flatte  et  qu'on  nous  applaudisse,  que  nous  ne  cerchions  toutesfois  sinon  qu'on  parle  a  nous  vivement,  qu'on  nous  remonstre  nos  fautes,  qu'on  nous  en  face  honte  et  qu'on  descouvre  nostre  turpitudo  et  que  nous  n'appetions  point  qu'on  nous  gratifie,  car  ce  seroit  pour  nous  faire  pourrir  en  nostre  mal,  quand  nous  le  voudrions  tenir  ainsi  cache,  qu'il  nous  coustera  bien  cher,  quand  nous  aurons  este  ainsi  flattez  par  les  hommes  et  que  cependant  le  Iuge  celeste  foudroyera  sur  nous.  Voila  donc  en  somme  comment  chacun  doit  faire  son  profit  de  ce  que  dit  ici  sainct  Paul,  que  quand  les  prescheurs  voudroyent  gratifier  et  complaire,  qu'ils  renoncent  quant  et  quant  Dieu:  et  s'ils  y  renoncent,  que  sera-ce  du  reste  du  peuple?  Ou  sera-il  conduit,  sinon  au  diable?  Ainsi  donc,  qu'un  chacun  retienne  cela  en  memoire  quand  il  vient  au  sermon,  que  celuy  qui  parle  ce  n'est  point  en  son  authorite,  mais  c'est  au  nom  de  nostre  Seigneur  Iesus  Christ,  qui  est  nostre  Iuge  establi  de  Dieu  son  Pere.  Or  pourquoy  est-ce  que  Iesus  Christ  nous  iuge?  C'est  a  fin  qu'un  chacun  de  nous  se  condamne,  et  qu'ayans  passe  condamnation  nous  venions  a  luy  pour  estre  absous.  Or  maintenant  donc,  si  l'homme  mortel  pour  quelque  amour  qu'il  me  porte  couvre  mes  pechez,  selon  que  ie  seray  espargne  de  luy,  le  Iuge  celeste  m'espargnera-il?  Et  ne  vaut-il  pas  mieux  que  celuy  qui  a  charge  de  m'enseigner  me  condamne,  et  qu'il  me  monstre  mes  vices,  a  fin  que  i'en  soye  touche,  que  i'apprenne  de  me  desplaire  en  ce  qui  me  meneroit  a  perdition?  Et  cependant  que  Dieu  a  les  bras  estendus  pour  me  recevoir,  et  que  Iesus  Christ  vient  au  devant  de  moy,  et  qu'il  me  pre-