47:324  acturus  esset  in  coelo  Christus,  sicuti  nos  argutis  illis  speculationibus  nunquam  fatigamur.  Atqui  studium  et  operam  alibi  locare  magis  convenit,  quomodo  scilicet  beatae  resurrectionis  futuri  simus  consortes.  Summa  porro  huius  sententiae  est,  quisquis  potitur  Christo,  nihil  illi  deesse:  ideoque  ultra  ultimam  perfectionem  eniti,  quisquis  eo  uno  contentus  non  est.  Ponit  autem  tres  gradus,  ac  si  principium  se  esse  diceret  ac  medium  et  finem.  Unde  sequitur  ab  ipso  incipiendum  esse,  in  eodem  pergendum  et  desinendum.  Non  est  certe  expetenda  altior  sapientia  quam  quae  nos  ad  vitam  aeternam  ducat.  Hanc  in  se  inveniri  testatur.  Iam  vitae  obtinendae  ratio  est,  ut  simus  novae  creaturae.  Hoc  quoque  non  alibi  quaerendum  esse  pronuntiat.  Et  simul  viam  se  esse  admonet,  qua  sola  illuc  pervenire  liceat.  Ergo  ne  qua  in  parte  nobis  desit,  manum  errantibus  praebet,  ac  eousque  se  demittit,  ut  lactentes  quoque  pueros  dirigat:  ducem  se  professus  non  relinquit  suos  in  medio  stadio,  sed  veritatis  compotes  facit.  Demum  efficit  ut  eius  fructum  percipiant,  quo  nihil  melius  vel  praestantius  fingi  potest.  Quum  via  sit  Christus,  non  est  quod  se  infirmi  et  rudes  ab  eo  querantur  destitui.  Quum  veritas  sit  et  vita,  habet  simul  in  se,  quo  perfectissimis  quibusque  satisfaciat:  denique  de  beatitudine  nunc  praedicat  Christus,  quod  nuper  dixi  de  fidei  obiecto.  Beatitudinem  hominis  in  solo  Deo  sitam  esse  certe  omnes  iudicant  et  fatentur,  sed  in  eo  postea  falluntur  quod,  Deum  alibi  quam  in  Christo  quaerentes,  eum  a  vera  sua  et  solida  divinitate  quodammodo  avellunt.  Veritas  quibusdam  hic  salvificam  coelestis  sapientiae  lucem  significat,  aliis  vero  substantiam  vitae  bonorumque  omnium  spiritualium,  quae  opponatur  umbris  et  figuris:  sicuti  capite  primo:  Gratia  et  veritas  per  Iesum  Christum  facta  est.  Mihi  veritas  pro  fidei  perfectione  accipi  videtur,  sicuti  via  pro  initio  et  rudimentis.  Haec  summa  est,  quod  si  quis  a  Christo  deflectat,  nihil  poterit  quam  errare:  si  quis  in  eo  non  acquiescat,  nihil  quam  vento  et  vanitate  alibi  pascetur:  si  quis  ultra  eum  tendat,  mortem  vitae  loco  inveniet.  Nemo  venit  ad  patrem.  Expositio  proximae  sententiae:  ideo  enim  via  est,  quia  nos  ad  patrem  ducit,  ideo  veritas  et  vita,  quia  in  eo  patrem  apprehendimus.  De  invocatione  quidem  hoc  vere  dici  potest,  quod  nullae  preces  nisi  Christi  patrocinio  exaudiantur:  sed  quia  hic  non  de  oratione  disserit  Christus,  simpliciter  intellige  homines  meros  sibi  fingere  labyrinthos,  quoties  relicto  Christo  ad  Deum  venire  contendunt.  Probat  enim  Christus  se  vitam  esse,  quia  non  alibi  quam  in  ipso  Deus,  apud  quem  est  fons  vitae,  possidetur.  Quare  omnis  extra  Christum  theologia  non  modo  confusa  est  ac  inanis,  sed  etiam  delira,  fallax  et  adulterina.  Nam  etsi  philosophis  praeclarae  interdum  voces  effluant,  nihil