1:324  [A  28;  B  26;  C  26.  habet.  Neque  vero  exigo  ut  homo  non  convictus  ultro  cedat;  et,  si  quas  facultates  habet,  ab  iis  animum  avertat,  quo  in  veram  humilitatem  subigatur;  sed  ut,  seposito  φιλαυτίας  καὶ  φιλονεικίας  morbo,  quo  excaecatus  aequo  altius  de  se  sentit,  in  veraci  scripturae  speculo  se  ipsum  probe  recognoscat.  31.  Ut  secundum  primam  illam  distinctionem,  qua  hominis  animam  in  intellectum  et  voluntatem  partiti  sumus,  orationis  ordo  procedat,  vim  intellectus  priore  loco  excutiamus.  Perpetuae  caecitatis  ita  eum  damnare,  ut  nihil  intelligentiae  ullo  in  genere  rerum  reliquum  facias,  non  modo  verbo  Dei,  sed  sensus  etiam  communis  experimento  repugnat.  Videmus  enim  insitum  esse  humano  ingenio  desiderium  nescio  quod  indagandae  veritatis,  ad  quam  minime  aspiraret,  nisi  aliquo  eius  odore  ante  percepto.  Est  ergo  iam  haec  nonnulla  humani  intellectus  perspicientia,  quae  1)  veritatis  amore  naturaliter  rapitur;  cuius  neglectus  in  brutis  animantibus  arguit  crassum  absque  ratione  sensum.  Quanquam  haec  qualiscunque  appetentia,  antequam  cursus  sui  stadium  ingrediatur,  deficit,  quia  mox  concidit  in  vanitatem.  Siquidem  mens  hominis  prae  hebetudine  rectam  veri  investigandi  viam  tenere  nequit;  sed  per  varios  errores  vagatur,  et  tanquam  in  tenebris  palpando  subinde  impingit,  donec  tandem  palata  evanescat.  Ita  veritatem  quaerendo,  quam  sit  ad  ipsam  et  quaerendam  et  inveniendam  inepta,  prodit.  Altera  deinde  vanitate  graviter  laborat:  quod  in  quarum  rerum  veram  notitiam  incumbere  expediat,  saepius  non  discernit.  Itaque  in  disquirendis  supervacuis  ac  nihili  rebus  ridicula  curiositate  se  torquet;  ad  res  maxime  cognitu  necessarias,  aut  non  advertit,  aut  contemptim  et  raro  deflectit;  studium  certe  suum  vix  unquam  serio  applicat.  De  qua  pravitate  quum  passim  conquerantur  profani  scriptores,  omnes  fere  se  ea  implicuisse  comperiuntur.  Quare  Solomo  in  toto  suo  Ecclesiaste,  ubi  ea  studia  est  persequutus  in  quibus  sibi  videntur  homines  valde  sapere,  inania  tamen  esse  et  frivola  pronuntiat.  32.  Neque  tamen  ita  conatus  eius  semper  in  irritum  cedunt,  quin  aliquid  assequatur,  praesertim  ubi  se  ipsam  ad  inferiora  ista  intendit.  Quin  etiam  non  ita  stupida  est,  quin  exiguum  quiddam  et  de  superioribus  delibet,  utcunque  negligentius  illis  percontandis  vacet;  non  id  quidem  aequa  facultate.  Nam  quum  supra  vitae  praesentis  spatium  evehitur,  tum  praecipue  demum  convincitur  suae  imbecillitatis.  Quare,  ut  melius  perspiciamus  quousque  pro  gradibus  suae  facultatis  in  unaquaque  re  procedat,  distinctionem  nobis  proponere  operae  pretium  est.  Sit  ergo  haec  distinctio:  esse  aliam  quidem  rerum  terrenarum  intelligentiam,  aliam  vero  coelestium.  1)  quod  1543  et  seqq