51:323  323  SERMON  VII  324  que  ceux  qui  sont  retenus  par  ceste  fole  opinion  de  leurs  merites,  se  separent  de  nostre  Seigneur  Iesus  Christ,  et  que  pour  estre  conioints  a  luy,  il  faut  renoncer  pleinement  a  tout  ce  que  nous  cuidons  avoir,  et  nous  venir  presenter  vuides  de  tout  bien,  afin  qu'il  nous  remplisse.  Et  voila  comme  aussi  sainct  Paul  dit  qu'il  a  mieux  aime  de  venir  au  port  de  salut  povre  et  desnue  du  tout,  que  de  vivre  au  milieu  de  la  mer,  et  estre  la  englouti.  Car  combien  qu'on  le  reputast  un  sainct  personnage,  et  comme  un  demi  Ange,  si  est-ce  qu'il  n'a  point  eu  regret  a  tout  cela,  a  fin  d'estre  participant  de  la  remission  qui  luy  estoit  donnee  en  Iesus  Christ,  et  de  la  grace  qu'il  a  communiquee  a  tous  ses  membres.  Ainsi  donc,  apprenons  de  tellement  magnifier  la  grace  de  Dieu,  que  nous  mettions  en  oubli  toutes  ces  fantasies  dont  le  diable  decoit  les  incredules,  en  les  enflant  de  ie  ne  scay  quel  orgueil,  et  que  nous  venions  tous  vuides  a  nostre  Seigneur  Iesus  Christ,  pour  mendier  de  sa  grace:  car  nous  ne  pouvons  en  recevoir  une  seule  goutte,  sinon  en  confessant  que  nous  en  sommes  du  tout  indignes.  Or  nous-nous  prosternerons  devant  la  maieste  de  nostre  bon  Dieu  etc.  SEPTIEME  SERMON.  Chap.  I,  v.  17.18.  Tous  hommes  de  nature  auront  bien  quelque  intelligence:  non  pas  qu'elle  se  monstre  si  tost  qu'ils  sont  nais:  mais  avec  le  temps  tous  auront  quelque  discretion  entre  le  bien  et  le  mal.  Et  voila  pourquoy  aussi  ils  sont  appelez  Creatures  raisonnables.  Mais  ce  que  nous  avons  de  nature  ne  suffiroit  pas  pour  parvenir  au  royaume  de  Dieu:  car  nous  defaillons  du  tout  quand  il  est  question  des  choses  appartenantes  a  la  vie  celeste.  Nous  voyons  que  chacun  sera  avise  pour  ses  negoces  et  autres  affaires  du  monde,  chacun  pensera  de  soy.  Et  puis,  combien  que  plusieurs  voudroyent  amortir  leur  conscience,  si  est-ce  neantmoins  que  Dieu  a  tellement  engrave  en  leurs  coeurs  un  sentiment  qu'il  faut  que  nostre  vie  soit  reiglee,  que  les  plus  meschans  et  les  plus  depravez  auront  bien  quelque  remors,  et  seront  contraints,  vueillent-ils  ou  non,  d'approuver  le  bien,  et  condamner  le  mal.  Il  est  vray  que  s'ils  ont  commis  quelque  faute,  ils  tascheront  de  l'excuser  par  vaines  couvertures.  Mais  quand  on  demandera,  si  meurtres,  si  violences,  si  larrecins,  si  paillardises,  si  fraudes  et  periures  sont  vertus,  on  dira,  Ce  sont  des  vices  a  condamner.  Chacun  parlera  ainsi:  car  Dieu  a  voulu  qu'il  y  eust  une  telle  cognoissance  imprimee  au  coeur  de  l'homme,  a  fin  qu'il  n'y  ait  nulle  excuse  que  tous  ne  soyent  condamnez,  et  qu'ils  ne  soyent  contraints  d'estre  mesmes  leurs  iuges.  Et  au  reste,  cela  ne  suffit  point  (comme  i'ay  dit)  pour  nous  conduire  iusques  a  Dieu,  et  pour  nous  ouvrir  tellement  le  Royaume  des  cieux,  que  nous  scachions  comme  nous  pourrons  estre  sauvez,  et  comme  nous  pourrons  invoquer  Dieu.  Nous  sommes  donc  aveugles  du  tout  en  cela:  car  nostre  veue  ne  s'estend  pas  outre  ce