50:322  rempart  du  coste  des  hommes:  comme  ceux  qui  veulent  attirer  les  hommes  simples  et  ignorans,  ils  emprunteront  du  credit  ca  et  la,  Ho,  un  tel  dit  ainsi:  mais  il  faut  que  Dieu  soit  escoute.  Car  quand  chacun  d'un  accord  nous  voudroit  destourner  de  luy,  il  est  certain  que  luy  seul  doit  emporter  un  million  de  mondes,  quand  autant  il  y  en  auroit.  Puis  qu'ainsi  est  donc,  notons  bien  la  doctrine  qui  est  ici  contenue,  quand  sainct  Paul  propose  son  affection,  qui  est  pour  nous  donner  une  reigle  generale:  comme  aussi  il  adiouste  quant  et  quant  qu'il  n'a  point  tasche  de  plaire  aux  hommes:  Car  sitost  qu'on  parle  a  l'appetit  des  hommes,  il  faut  que  la  verite  de  Dieu  soit  corrompue.  Aussi  il  adiouste  que  s'il  plaisoit  aux  hommes,  il  ne  seroit  point  serviteur  de  Iesus  Christ.  Or  le  diable  a  beaucoup  de  moyens  et  d'artifices  pour  tellement  obscurcir  la  verite  de  Dieu,  qu'il  nous  semblera  bien  que  tousiours  nous  sommes  avec  Dieu:  et  cependant  nous  en  serons  bien  eslongnez,  sinon  que  nous  ayons  prudence  et  discretion,  comme  elle  nous  est  ici  donnee.  Que  donc  nous  scachions  discerner  Dieu  d'avec  les  hommes,  tellement  que  nous  ne  soyons  point  esbahis  ni  estonnez,  quand  nous  verrons  beaucoup  de  contradictions,  beaucoup  d'opinions  diverses,  beaucoup  de  combats  et  de  disputes,  que  cela  ne  soit  point  pour  nous  faire  changer  de  foy.  Et  pourquoy?  Regardons  seulement  si  nous  pourrons  estre  asseurez  en  Dieu  :  quand  nous  aurons  cela,  despitons  hardiment  tout  le  monde.  Mais  si  nous  ne  sommes  bien  appuyez  en  nostre  foy,  il  est  certain  qu'a  chacune  bouffee  de  vent  nostre  foy  sera  renversee,  ou  bien  elle  ne  fera  que  vaguer  de  coste  et  d'autre.  Que  donc  nous  prenions  un  tel  goust,  que  nous  scachions  que  c'est  Dieu  vrayement  qui  a  eu  pitie  de  nous,  afin  de  nous  declarer  sa  volonte:  et  que  nous  regardions  bien  a  ceux  qui  nous  enseignent,  de  quelle  affection  ils  sont  conduits  et  gouvernez,  et  s'ils  cerchent  d'obeir  a  Dieu  de  leur  part,  de  nous  conduire  a  ce  chemin-la  par  leur  exemple.  Et  au  reste  ceste  doctrine  emporte  beaucoup  quand  sainct  Paul  dit  que  s'il  plaisoit  aux  hommes,  il  ne  seroit  point  serviteur  de  Iesus  Christ.  Car  nous  scavons  de  faict,  quels  sont  les  hommes  de  leur  nature:  il  n'y  a  qu'iniquite  et  rebellion  a  l'encontre  de  Dieu.  Si  donc  nous  leur  voulons  gratifier,  il  faudra  que  nous  quittions  Dieu,  et  que  nous  n'ayons  rien  de  commun  avec  luy.  Car  les  hommes  tendent  tousiours  au  rebours,  sinon  qu'on  tasche  de  les  faire  approcher  de  Dieu,  ils  regimbent  comme  bestes  sauvages.  Nous  ne  leur  pourrons  donc  complaire  sinon  en  nous  esgarant  de  Dieu,  et  laschant  la  bride  a  ceux  qui  tracassent  de  coste  et  d'autre:  et  puis  mesmes  les  bons  quelquefois  voudroyent  que  Dieu  se  conformast  a  leurs  appetis.  Car  combien  que  desia  ils  ayent  ceste  21