49:322  tiam,  quae  sine  fastidio  illi  non  tantum  cedat  et  se  subiiciat,  sed  etiam  tanquam  ancilla  dominae  serviat.  Nam,  sicut  ait  Augustinus,  qui  Petrum  dedit  piscatorem,  dedit  et  Cyprianum  rhetorem.  Quo  significat,  ambos  a  Deo  esse:  utcunque  alter,  qui  dignitate  multo  est  superior,  omni  dicendi  gratia  sit  destitutus  :  alter,  qui  ad  illius  pedes  sedet,  facundiae  laude  excellat.  Haec  ergo  eloquentia  nec  damnanda,  nec  adspernanda  est,  quae  non  huc  spectat  ut  Christianos  in  externo  verborum  colore  detineat,  ut  eos  inebriet  vana  oblectatione,  ut  suo  tinnitu  aures  feriat,  ut  sua  pompa  tanquam  involucro  obruat  Christi  crucem:  sed  potius  ut  ad  nativam  evangelii  simplicitatem  nos  revocet,  ut  ipsa  sponte  se  in  ordinem  redigens  solam  crucis  praedicationem  extollat,  ut  denique  tanquam  praeconis  officio  fungatur  ad  comparandam  piscatoribus  illis  et  idiotis  audientiam,  qui  nihil  praeter  spiritus  energiam  gratiae  habent.  Deinde  respondeo,  suam  quoque  esse  spiritui  Dei  eloquentiam:  sed  quae  nativo  magis  et  proprio,  vel  potius  intrinseco  (ut  loquuntur)  splendore,  quam  adscititiis  ornamentis  luceat.  Talem  habent  prophetae,  praesertim  Iesaias,  David,  et  Solomon:  tali  etiam  adspersus  est  Moses.  Quin  et  in  scriptis  apostolorum,  etiamsi  magis  sint  inculta,  eius  tamen  scintillulae  quaedam  interdum  emicant.  Proinde  eiusmodi  eloquentia  spiritui  Dei  convenit,  quae  non  ostentatione  turgeat,  nec  crepet  inanem  sonitum  :  sed  quae  solida  sit  et  efficax  plusque  sinceritatis  habeat  quam  elegantiae.  18  Nam  sermo  crucis,  ete.  In  hoc  priore  membro  concessio  est.  Quoniam  enim  obiicere  promptum  erat,  evangelium  passim  haberi  contemptui,  si  ita  nudum  et  humile  proferatur,  hoc  Paulus  ultro  concedit.  ��Sed  quum  addit,  id  fieri  ab  iis  qui  pereunt,  significat  minime  standum  esse  eorum  iudicio.  Quis  enim  hac  mercede  evangelium  contemnere  velit,  ut  pereat?  Sic  ergo  resolvi  debet  haec  sententia:  utcunque  sermo  crucis,  quia  non  est  humanae  sapientiae  commendatione  gratiosus,  stultitia  reputetur  ab  iis  qui  pereunt:  nobis  tamen  illic  sapientia  Dei  elucet.  Oblique  autem  perstringit  pravum  Corinthiorum  iudicium,  qui  quum  verborum  lenocinio  facile  allicerentur  ab  ambitiosis  doctoribus,  apostolum  instructum  Dei  potentia  ad  eorum  salutem  fastidiebant  hoc  tantum  nomine,  quod  in  praedicando  Christo  insisteret.  Quomodo  autem  sermo  crucis,  potentia  Dei  sit  in  salutem,  diximus  Rom.  1,  16.  19.  Scriptum  est  enim,  ete.  Melius  etiamnum  Iesaiae  testimonio  confirmat  quam  indignum  sit  hoc  praeiudicio  gravari  evangelii  veritatem,  propterea  quod  eam  mundi  sapientes  ludibrio,  nedum  contemptui  habeant.  Patet  enim  ex  prophetae  verbis  quam  pro  nihilo  ducatur  eorum  sententia  apud  Deum.  Locus  sumptus  est  ex  Iesaiae  29,  14,  tibi