49:321  321  CAPUT  I.  322  ad  eam  ornandam  eloquentiae  color  adhibeatur.  Respondeo  ad  prius,  valde  a  ratione  esse  dissentaneum  ut  eas  artes  in  universum  damnet  Paulus,  quas  constat  praeclara  esse  Dei  dona,  quibus  homines  tanquam  organis  ad  bonos  usus  adiuvantur.  Artes  igitur  non  superstitiosae,  sed  quae  solidam  eruditionem  continent  verisque  rationibus  nituntur,  sicut  utiles  sunt  et  accommodae  communi  vitae  hominum,  ita  non  dubium  est  quin  a  spiritu  sancto  sint  profectae:  et  utilitas,  quae  ex  illis  percipitur  ac  sentitur,  non  alteri  quam  Deo  accepta  referri  debet:  non  est  ergo  quod  hic  dicit  Paulus,  in  contumeliam  artium  accipiendum,  quasi  pietati  adversentur.  Secunda  quaestio  paulo  plus  habet  difficultatis:  dicit  enim  exinaniri  Christi  crucem,  si  qua  sermonis  sapientia  admisceatur.  Respondeo,  considerandum  esse  quos  alloquatur  Paulus.  Pruriebant  Corinthiorum  aures  stulta  cupiditate  magniloquentiae:  prae  aliis  ergo  ad  crucis  humilitatem  revocandi  erant,  ut  discerent  nudum  Christum  et  simplex  evangelium  absque  fuco  ullo  amplecti.  Quamquam  hanc  sententiam  quodammodo  perpetuam  esse  fateor,  Christi  crucem  exinaniri  non  tantum  mundana  sapientia,  sed  verborum  quoque  splendore.  Christi  enim  crucifixi  praedicatio  simplex  est  ac  nuda:  obfuscari  ergo  verborum  fuco  non  debet.  Evangelii  proprium  est,  mundi  sapientiam  sic  in  ordinem  redigere,  ut  proprio  sensu  vacui  dociles  nos  tantum  praebeamus,  nec  aliud  scire  nos  putemus,  aut  etiam  appetamus,  quam  quod  Dominus  ipse  docet.  De  sapientia  carnis  fusius  mox  tractandum  erit,  qualiter  Christo  repugnet:  de  eloquentia  paucis  hic  perstringam  quantum  locus  requirit.  Videmus  Deum  ita  ab  initio  ordinasse,  ut  evangelium  omni  eloquentiae  subsidio  nudum  administraretur.  Qui  linguas  hominum  format  ad  facundiam,  non  posset  ipse  disertus  esse  si  vellet?  quum  posset,  noluit.  Cur  noluerit,  duas  potissimum  rationes  invenio:  altera  est  ut  in  rudi  et  impolito  sermone  magis  conspicua  appareret  veritatis  suae  maiestas,  et  sola  spiritus  efficacia  absque  externis  adminiculis  in  hominum  animos  penetraret.  Altera  vero,  ut  nostram  obedientiam  ac  docilitatem  melius  experiretur,  et  simul  ad  veram  humilitatem  erudiret.  Solos  enim  parvulos  in  scholam  suam  admittit  Dominus:  ergo  illi  demum  coelestis  sapientiae  sint  capaces,  qui  praedicatione  crucis  in  speciem  abiecta  contenti  larvatum  Christum  nequaquam  desiderant.  Ideo  in  hunc  finem  evangelii  doctrinam  attemperari  oportuit,  ut  ab  omni  fastu  et  altitudine  abstraherentur  fideles.  Quid  autem  si  quispiam  hodie  paulo  nitidius  disserendo,  evangelii  doctrinam  eloquentia  illustret?  an  propterea  repudiandus  erit,  quasi  vel  eam  contaminet,  vel  obscuret  Christi  gloriam?  Respondeo,  primum  nihil  pugnare  cum  evangelii  simplicitate  eloquen-