5:320  postea  libertatis  vindicibus,  Esra  et  Nehemia  facta  est.  Cui  iam  criminationi  patere  factum  nostrum  potest,  tot  classicis  autoribus  munitum?  Tanta  igitur  necessitate  adacti,  senatum  ea  de  re  nostrum  appellavimus:  et  oblata  confessionis  formula,  impense  rogavimus,  ut  ne  dare  Domino  gloriam  in  profitenda  eius  veritate  gravaretur.  Aequum  esse,  ut  in  actione  tam  sancta  populo  suo  praeirent,  cui  se  omnis  virtutis  exemplar  esse  oportere  noverat.  Quae  erat  postulati  nostri  aequitas,  facile  impetravimus,  ut  plebs  decuriatim  convocata  in  confessionem  istam  iuraret.  Cuius  in  praestando  iuramento  non  minor  fuit  alacritas,  quam  in  edicendo  senatus  diligentia.  Atque  divinae  legis  observationem  iureiurando  polliceri  iussi  sunt,  id  vero  excusari  nullo  modo  potest.  Qui  tam  inconsiderate  obstrepere  audent,  non  animadvertunt  quibuscum  certamen  suscipiant.  Quale  enim  est  foedus,  quod  Iosias,  approbante  Domino,  suo  populique  nomine  percussit  ?  Nempe  ut  coram  Domino  ambularet,  praecepta  et  testimonia  et  iustificationes  eius  custodiret  in  toto  corde  suo  et  tota  anima:  quibus  conditionibus  universi  Iudaei  fidem  suam,  non  sine  iureiurando,  obstrinxerunt.  Sub  Asa  iisdem  legibus  foedus  sancitum  filit,  iuratumque  in  toto  corde  cum  iubilo,  cum  voce  magna,  clangore  tubae,  et  sonitu  buccinarum.  Idem  sacramentum,  stipulantibus  Esra  et  Nehemia,  praestitum  fuit:  in  quo  etiam  parentes  pro  tenellis  liberis,  et  fratres  natu  grandiores  pro  nondum  adultis  spondebant.  Eiusmodi  iuramentis,  quibus  ad  servandam  Dei  legem  homines  obstringebantur,  praefuisse  Dominum,  scriptura  testatur.  Neque  mirum,  quum  sub  aeterno  illo  foedere  continerentur,  quod  semel,  ipso  praeside,  auspice  atque  autore,  statim  post  legem  promulgatam,  sancitum  fuerat.  Cum  tot  ergo  ecclesiae  primoribus,  cum  principe  omnium  prophetarum  Mose,  cum  Deo  ipso  disceptent,  qui  talem  promissionis  formam  licentiosa  maledicentia  insectari  sibi  permittunt.  Sed  quo  iure  Dominus  in  peierandi  fraudem  suos  induxisse  putabitur,  qui  legis  suae  observationem  stipulando,  misericordiam  vicissim  et  peccatorum  veniam  promittebat?  Cur  periurii  populus  arguetur  qui  se  obstringendo,  gratiam  sibi  oblatam  simul  apprehendebat?  Quod  si  tamen  hanc,  quam  conscripsimus  sacramenti  formulam,  cum  illa  mosaica  compararint,  tot  sanctis  viris  damnatis,  absolvere  nos  cogentur.  Nos  enim  sumus  internuncii  foederis,  quod  Dominus  dum  per  Ieremiam  pollicetur  (Ier.  31,  31  ss.),  inviolabile  fore  pronunciat.  Siquidem  nobis  mandatum  est  verbum  reconciliationis  (2  Cor.  5,  19),  cuius  summa  est:  Christum,  qui  peccatum  non  noverat,  pro  nobis  peccati  purgationem  esse  factum,  ut  iustitia  Dei  in  illo  simus.  Hic  non  exigitur  ab  hominibus,  ut  legis  iustitiam  consectentur:  verum  ut  propria  iustitia  destituti,  Christi  iustitia  induan-