58:32  Tu  m'es  une  creature  vilaine,  et  que  ie  reiette  et  reprouve.  Ou  est-ce  donc  qu'elle  en  est,  quand  elle  apprehende  toutes  ces  choses?  Et  ainsi,  il  ne  nous  faut  point  trouver  estrange,  si  en  telle  angoisse  elle  eust  mieux  aime  mourir,  que  de  voir  une  chose  si  monstrueuse,  qui  estoit  contre  l'ordre  de  nature.  Toutesfois  ii  est  dit,  qu'en  telle  tristesse,  elle  ne  laisse  pas  de  recourir  a  Dieu.  Et  de  faict,  elle  obtient  response,  qui  est  pour  la  consoler:  non  pas  qu'il  n'y  ait  encores  du  regret  mesle  parmi:  mais  tant  y  a  que  Dieu  luy  modere  ceste  passion  qu'elle  avoit  si  fascheuse,  et  dit  qu'il  y  a  deux  peuples  en  son  ventre  :  comme  s'il  disoit  que  ce  n'est  pas  seulement  pour  les  deux  enfans  qu'elle  porte,  mais  que  cela  tend  plus  loin:  c'est  assavoir,  qu'ils  seront  divisez  l'un  d'avec  l'autre.  Et  combien  que  tous  deux  soient  fils  d'Abraham,  et  qu'il  ait  este  dit  a  Abraham,  qu'en  sa  semence  toutes  nations  de  la  terre  seront  benites:  toutesfois  qu'il  faudra  que  d'Isaac  descendent  ceux  que  Dieu  retrenchera  de  son  Eglise,  lesquels  seront  reprouvez,  et  lesquels*  seront  ennemis  de  l'Eglise  de  Dieu  par  consequent.  Or  il  est  vray  que  cela  encores  pouvoit  bien  navrer  d'une  douleur  mortelle  tant  Isaac  que  Rebecca:  mais  cependent  si  est-ce  qu'ils  voient  que  la  bonte  de  Dieu  n'est  pas  esteinte,  et  qu'il  se  monstre  fidele  en  ce  qu'il  a  une  fois  prononce.  Or  il  est  dit,  Que  le  plus  grand  servira  au  moindre.  Enquoy  Rebecca  cognoist,  que  d'elle,  quoy  qu'il  en  soit,  viendra  ceste  semence  benite,  qui  avoit  este  promise.  Voila  en  somme  ce  qui  est  ici  recite.  Or  le  tout  seroit  obscur,  s'il  n'estoit  declare  par  le  menu.  Notons  donc  ici,  que  ceux  qui  sont  appelez  en  l'Eglise,  n'y  demeurent  pas  tousiours,  comme  desia  nous  avons  veu  l'exemple  notable  en  Ismael:  lequel  estoit  fils  aisne  d'Abraham,  toutesfois  il  a  este  banni  de  la  maison,  et  a  este  dit  qu'il  ne  seroit  pas  heritier.  Et  cela  n'estoit  pas  des  richesses  du  monde,  ni  des  possessions  qu'eust  Abraham.  Il  estoit  riche  en  bestail,  en  or  et  en  argent:  mais  il  n'avoit  pas  un  pie  de  terre.  Cest  heritage  donc  a  quoy  se  raporte-il?  C'est  a  la  promesse  spirituelle:  c'est  assavoir  que  Dieu  avoit  choisi  la  semence  d'Abraham,  pour  dire,  Ce  sera-ci  un  peuple  qui  sera  dedie  a  mon  service:  ceux  qui  en  viendront,  ie  les  recoi  et  accepte  pour  mes  enfans,  afin  de  les  recueillir  en  la  vie  eternelle.  Voila  comme  Ismael,  avec  sa  primogeniture,  est  deboute  de  l'esperance  de  vie:  et  Isaac  demeure  lui  seul.  Ainsi  en  est-il  quant  a  Esau  et  Iacob:  car  tous  deux  sont  descendus  d'Abraham,