41:32  patefecit  Abrahae.  Atque  ut  hoc  clarius  explicem:  cur  Danielis  vocatur  Deus  potius  quam  Babyloniorum?  nempe,  quoniam  Daniel  ut  didicerat  ex  lege  Mosis,  ita  pure  colebat  Deum,  qui  foedus  suum  percusserat  cum  Abraham  et  sanctis  patribus,  et  qui  adoptaverat  sibi  Israelitas  in  peculium.  Hoc  igitur  pendebat  a  cultu  in  lege  praescripto:  cultus  autem  pendebat  a  foedere.  Ideo  hic  nomen  Danielis  non  ponitur  ac  si  liberum  ei  fuerit,  confingere  aut  imaginari  aliquem  deum:  sed  quia  Deum  illum  colebat,  qui  se  patefecerat  verbo  suo.  Denique  haec  loquutio  sic  debet  resolvi,  ut  sibi  omnes  metuant  a  Deo,  qui  foedus  suum  pepigit  cum  Abraham  et  eius  posteris,  et  qui  sibi  elegit  populum  illum  peculiarem:  qui  rationem  veri  et  legitimi  cultus  docuit,  atque  ostendit  lege  sua,  et  quem  Daniel  coluit.  Nunc  ergo  tenemus  quid  hoc  sibi  velit.  Ergo  discamus  Deum  verum  ab  omnibus  idolis  et  hominum  figmentis  discernere,  si  cupimus  ei  probari  cultum  nostrum.  Nam  multi  Deum  se  putant  colere,  qui  tamen  vagantur  per  quoscunque  libuit  errores,  nec  sunt  affixi  uni  vero  Deo.  Hoc  autem  perversum  est:  imo  nihil  aliud  est  quam  profanatio  verae  pietatis,  ita  confuse  Deum  colere.  Ideo  tenendum  est  discrimen  quod  dixi,  ut  semper  inclusae  sint  mentes  nostrae  intra  fines  verbi,  ne  aberrent  a  vero  Deo:  si  quidem  cupimus  ipsum  retinere,  et  religionem  sequi  quae  ei  placeat.  Dico  manendum  intra  limites  verbi,  neque  vel  huc  vel  illuc  declinandum:  quia  statim  occurrent  nobis  innumerae  diaboli  fallaciae,  nisi  verbum  nos  quasi  constrictos  teneat.  Quantum  ad  Darium  spectat,  agnovit  quidem  illum  esse  summum  Deum:  sed  quemadmodum  iam  diximus,  non  abiecit  fictitios  et  perversos  cultus,  quibus  assueverat.  Talis  autem  mixtura  intolerabilis  est  coram  Deo.  Adiungit,  quia  ipse  est  vivus  et  permanet  in  saeculum.  Videtur  quidem  hic  in  nihilum  redigere  falsos  omnes  deos:  sed  iam  ante  dictum  fuit,  et  res  ipsa  demonstrat,  profanos  homines  sic  erigere  mentes  ad  summum  Deum,  ut  statim  evanescant.  Si  ergo  constanter  agnoscerent  verum  Deum,  statim  excluderent  omnia  figmenta:  sed  putant  satis  esse,  si  Deus  primum  gradum  obtineat:  interim  adiungunt  minores  deos,  ut  lateat  quasi  in  turba,  etiamsi  ei  tribuant  aliquam  eminentiam.  Talis  igitur  fuit  ratio,  et  tale  consilium  Darii,  quia  nihil  sincerum  vel  liquidum  tenuit  de  unica  Dei  essentia,  sed  putavit  summam  potestatem  esse  in  Deo  Israelis,  utcunque  aliae  gentes  colerent  suos  deos.  Sic  videmus  ut  non  discesserit  a  superstitionibus,  quas  imbiberat  a  pueritia.  Et  ideo  non  est  cur  laudemus  eius  pietatem,  nisi  in  hoc  particulari  actu,  ut  loquuntur.  Interim  tamen  Deus  confessionem  extorsit  ex  eius  ore,  in  qua  describitur  nobis  ipsius  natura.  Vocat  Deum  vivum,  non  tantum  quod  vitam  in  se  habeat,  sed  ex  se,  et  quod  etiam  sit  fons  et  origo  vitae.