40:32  ratio  est  cur  non  duo  tantum  Cherubim  propositi  fuerint  ante  oculos  prophetae,  sed  quatuor:  quia  oportuit  Dei  providentiam  in  rebus  terrenis  patefieri.  Populus  enim  tunc  imaginatus  fuit  Deum  inclusum  esse  in  coelo.  Ergo  propheta  non  tantum  in  coelo  ipsum  regnare  docet,  verum  moderari  res  terrenas.  Et  hac  ratione,  et  hoc  fine  extendit  eius  potentiam  per  quatuor  mundi  plagas.  Cur  autem  singulis  animalibus  attribuit  quatuor  capita?  Respondeo,  virtutem  angelicam  hic  nobis  demonstrari  in  cunctis  animantibus.  Est  tamen  synecdoche,  quia  Deus  per  angelos  suos  operatur  non  tantum  in  hominibus  et  reliquis  animantibus,  sed  in  cunctis  creaturis.  Verum  quia  res  exanimes  non  habent  agitationem  ex  se  ipsis,  ideo  Deus  quia,  ut  dixi,  volebat  rudem  et  crassum  populum  instituere,  proposuit  sub  animalibus  imaginem  rerum  omnium.  Quantum  vero  ad  animantes  spectat,  homo  tenet  praecipuum  gradum,  quia  formatus  est  ad  imaginem  Dei,  leo  inter  feras  bestias  dominatur:  bos  autem  quia  est  animal  utilissimum,  repraesentat  omnes  animantes  domesticas,  vel  cicures,  ut  loquuntur.  Quoniam  autein  aquila  est  avis  regia,  ideo  comprehenduntur  aves  omnes  sub  hac  voce.  Ego  hic  non  fabrico  allegorias,  sed  tantum  literalem  sensum  amplector.  Illud  videtur  mihi  iam  satis  esse  firmum,  quod  Deus  angelicas  inspirationes  significet  per  quatuor  Cherubim,  et  extendat  ad  quatuor  mundi  plagas.  Iam  ut  simul  pateat,  nullam  creaturam  a  se  ipsa  moveri,  sed  omnes  agitationes  esse  ex  arcano  Dei  instinctu,  ideo  singulis  Cherubim  tribuit  quatuor  capita:  quasi  diceret  angelos  exercere  imperium  Dei  in  toto  orbe,  non  tantum  in  parte  aliqua:  deinde  sic  agitari  omnes  creaturas,  ac  si  coniunctae  essent  cum  ipsis  angelis.  Dicit  ergo  esse  quatuor  singulis  capita,  nempe  quia  si  fidei  oculis  reputemus  quomodo  Deus  mundum  gubernet,  apparebit  in  omni  agitatione  virtus  illa  angelica.  Ergo  perinde  est  ac  si  angeli  gestarent  capita  omnium  animalium,  hoc  est  in  se  comprehenderent  palam  et  conspicue  omnia  elementa,  et  omnes  mundi  partes.  Hoc  de  quatuor  capitibus.  Quantum  attinet  ad  quatuor  rotas,  non  dubito  quin  omnes  conversiones  significent,  quas  vulgo  nominant  revolutiones.  Nam  videmus  mundum  converti  subinde,  et  quasi  induere  novas  facies:  perinde  est  ac  si  rota  una  sese  volveret,  aut  aliunde  impulsa  conficeret  suum  cursum.  Quoniam  ergo  nullus  est  firmus  status  in  mundo,  sed  assiduae  conversiones  cernuntur.  Ideo  propheta  hic  angelis  coniungit  rotas:  quasi  diceret  quidquid  mutationum  cernitur  in  mundo  non  fortuito  oriri,  sed  aliunde  pendere,  nempe  ab  angelis,  non  quod  ipsi  propria  virtute  quidquam  moveant,  sed  quatenus  sunt  manus  Dei,  ut  iam  diximus.  Et  quia  conversiones  istae  sunt  contortae,  dicit  propheta  se  vidisse  rotam  in  rota.  Neque  enim  conti-