38:32  ministros,  qui  exercent  hanc  iurisdictionem,  praeditos  esse  prudentia  et  consilio  et  discretione.  Verbum  Dei,  inquit  Apostolus  (Hebr.  4,  12),  simile  est  gladio  ancipiti,  vel  utrinque  scindenti,  quia  penetrat  usque  ad  corda,  et  mentes,  et  medullas  ipsas.  Et  scimus  etiam  quid  dicat  Paulus  (1.  Cor.  14,  25),  Si  quis  incredulus,  inquit,  veniat  in  coetum  vestrum,  examinatur  eius  conscientia:  ita  cogetur  se  prosternere  et  dare  gloriam  Deo.  Et  huc  refertur  etiam  illud  Christi  dictum,  Spiritus  quum  veniet  iudicabit  mundum  (Ioan.  16,  8).  Nam  spiritus  nomine  designat  evangelii  praedicationem.  Necesse  est  igitur  verbi  ministros  admonitos  esse,  ut  probe  et  cum  fructu  munere  suo  fungantur,  tenere  fallacias,  et  ambiguos  recessus  quibus  solent  homines  fallere.  Quoniam  ergo  multa  sunt  abscondita  in  cordibus  hominum,  qui  volet  efficaciter  docere,  necesse  est  ut  teneat,  excutiendos  esse  intimos  cordium  recessus.  Ideo  propheta  audivit  a  Deo,  populum,  cui  praefectus  erat,  fallacem  esse,  et  refertum  dolis  ac  fraudibus.  Tu  ergo  habitas  in  medio  populi  dolosi:  quasi  diceret,  Tibi  negotium  est  cum  hominibus  perversis,  et  qui  non  tantum  scelera  sua  aperte  produnt,  sed  qui  etiam  fallunt,  ubi  simulant  aliquid  resipiscentiae,  vel  profitentur  se  fore  Deo  morigeros.  Ergo  ne  blanditiis  istis  animum  tuum  debilitent,  vel  deliniant,  statue  tibi  esse  certandum  cum  illorum  fraudibus.  Haec  est  una  ratio.  Altera  autem:  quia  sicuti  necesse  est  servos  Dei  cognoscere  eorum  fraudes  quos  iubentur  coarguere,  ita  opus  est  magnitudine,  et  constantia,  ne  scilicet  terreat  ipsos  hypocrisis.  Nam  posset  hoc  venire  in  mentem  servis  Dei.  Quid  faciam?  mihi  enim  occultae  sunt  hominum  mentes:  iam  doctrina  debet  penetrare  in  omnes  affectus:  ego  autem  non  divino  quid  in  unoquoque  lateat.  Possent  igitur  ita  animis  debilitari  pii  doctores  et  frangi,  vel  prorsus  concidere,  nisi  Deus  ipsos  fulciret.  Hac  igitur  de  causa  audivit  Ieremias  sibi  versandum  esse  cum  populo  doloso  et  fallaci.  Postea  addit,  in  dolo  renuunt  cognoscere  me.  Prius  conquestus  fuerat  Deus  se  non  cognosci  a  populo:  nunc  autem  crimen  illud  exaggerat,  quod  scilicet  astute  subterfugiant  omnem  lucem:  quasi  diceret  eos  non  posse  obtendere  errorem,  aut  levitatem  aliquam.  Dolo  enim  renuunt  me  cognoscere,  inquit  Deus,  hoc  est,  quia  prorsus  sibi  placent  in  fallaciis,  ideo  exstinguunt,  quantum  in  se  est,  lucem  data  opera,  vel  consulto.  Per  dolum  igitur  intelligit  illam  obstinatam  vafritiem,  qua  fiebat  ut  populus  abiiceret  omnem  doctrinam.  Postea  sequitur,  7.  Propterea  sic  dicit  Iehovah  exercituum.  Ecce  ego  examinabo  eos  (vel,  conflabo:  ad  verbum,  examinans,  vel  confians),  et  probabo  eos:  nam  quomodo  agerem  cum  filia  (ad  verbum  a  facie  filiae)  populi  mei?