36:32  a  suis  patribus.  Porro  quatuor,  quos  videmus,  titulis  ornat  gentem  suam,  parum  honorificis  et  valde  remotis  ab  ea  opinione  quam  de  se  conceperat.  Sic  enim  expergefaciendi  sunt  hypocritae:  et  quo  magis  sibi  indulgent,  nec  reguntur  timore  Dei,  fulminibus  verborum  quatiendi  sunt.  Frigeret  enim  erga  tales  homines  simplicior  doctrina:  nec  eos  Vulgaris  exhortatio  commoveret.  Detrahenda  etiam  falsa  persuasio  sanctitatis,  iustitiae,  prudentiae,  qua  se  plerumque  tegunt  et  inaniter  gloriantur.  (Quia  dereliquerunt)  Subiicit  rationem  cur  tam  severe  eos  graviterque  reprehenderit,  ne  scilicet  suo  more  querantur  nimis  aspere  et  duriter  secum  agi.  Ac  primum  quidem  illis  defectionem  a  Deo  exprobrat,  quod  est  malorum  omnium  caput.  Quemadmodum  enim  summa  iustitiae  perfectio  est,  Deo  adhaerere,  quo  etiam  pertinet  illud  Mosis:  Nunc  Israel  quid  petit  abs  te  Deus  tuus,  nisi  ut  sibi  adhaereas:  ita  ubi  ab  eo  descivimus  actum  est  de  nobis.  Consilium  autem  prophetae  est,  non  unius  criminis  in  specie  reos  facere  Iudaeos,  sed  ostendere  prorsus  esse  apostatas.  Quod  sequitur,  ad  amplificationem  haud  dubie  facit:  sive  Irritare  legas,  sive  Spernere,  quod  posterius  magis  amplector.  Foeda  'enim  indignitas  fuit  pro  nihilo  ducere  eius  gratiam,  qui  eos  solos  ex  omnibus  populis  adoptaverat.  Et  hac  ratione  vocat  Sanctum  Israelis;  quia  se  illis  addicens  sua  sanctitate  simul  eos  ornaverat.  Siquidem  ab  effectu  nomen  hoc  ei  passim  tribuitur.  In  tanti  vero  honoris  contemptu,  quam  barbara  superbia  fuit?  Siquis  verbum  Irritandi  magis  probet,  sensus  erit,  Deum  repudiasse,  ac  si  data  opera  iram  eius  provocare  vellent:  unde  apparet  quam  detestabilis  sit  eorum  apostasia.  (Abalienati  sunt  retrorsum.)  Sensus  quidem  est,  quum  Dominus  ipsis  certam  vivendi  viam  et  rationem  proponeret,  cupiditatibus  suis  abreptos  fuisse:  proximam  tamen  sententiam  confirmat,  nempe  adeo  effraenem  fuisse  eorum  petulantiam,  ut  se  ipsos  a  Deo  prorsus  abdicaverint:  ac  data  opera  a  scopo,  in  quem  dirigenda  vita  erat,  retro  cursum  flexisse.  5.  (Quorsum  percutiemini.)  Aliqui  vertunt  Super  quo,  vel  in  qua  parte:  atque  ita  accipiunt  ac  si  Dominus  sibi  nullum  amplius  flagellum  esse  diceret:  quia  tam  variis  modis  eos  in  viam  reducere  conatus  sit,  ut  nulla  amplius  supersit  ratio  castigandi.  Ego  vero  malo  interpretari  Quorsum:  ut  etiam  voci  hebraeae  congruit,  et  convenientior  mihi  sensus  esse  videtur.  Idem  enim  est  quod  vulgo  dicimus  A  quel  propos,  Pour  quelle  fin.  Nam  significat  Iudaeos  eo  impietatis  et  scelerum  progressos  esse,  ut  ne  plagis  quidem  meliores  fore  credibile  sit.  Nam  desperatos  homines  postquam  obduruerint,  scimus  frangi  potius  quam  corrigi:  et  conqueritur  de  tanta  eorum  pervicacia,  ac  si  medicus  tentatis  omnibus  remediis  artem  iam  cessare  diceret.  Interim