35:32  Et  pourquoi?  Car  nous  y  serons  trompez  tous  les  coups,  ainsi  que  nous  avons  desia  monstre.  Or  la  dessus  Eliu  reproche  aux  amis  de  Iob  qu'ils  ont  este  confus.  Pai  attendu,  dit-il,  et  ils  n'ont  plus  parle,  ils  ont  quitte  leurs  propos.  En  ceci  il  signifie,  que  d'autant  qu'ils  avoyent  este  mal  fondez,  ils  sont  demeurez  confus:  car  nous  savons  que  la  verite  sera  tousiours  invincible.  Vrai  est  que  celui  qui  aura  bonne  cause,  ne  sera  pas  tousiours  ouy,  comme  nous  voyons  qu'une  bonne  cause  sera  opprimee  par  des  gens  escervelez  et  enragez  quand  ils  auront  la  vogue  (car  ils  clorront  la  bouche  a  ceux  qui  auroyent  iuste  occasion  de  parler)  mais  tant  y  a  que  si  les  choses  sont  conduites  par  bon  ordre,  quand  un  homme  aura  bonne  cause,  Dieu  lui  donnera  aussi  dequoi  la  maintenir:  car  la  verite  (comme  nous  avons  dit)  sera  victorieuse.  Ainsi  donc  ce  n'est  pas  sans  cause  qu'Eliu  se  mocque  des  amis  de  Iob,  lesquels  sont  demeurez  confus  au  milieu  du  chemin.  Pourtant  sachons  quand  nous  aurons  bien  cognu  une  chose  estre  vraye,  que  Dieu  nous  donnera  aussi  argumens  et  raisons  pour  tenir  bon,  afin  que  nous  ne  soyons  point  vaincus  par  ceux  qui  taschent  de  mettre  bas  la  verite,  et  la  convertir  en  mensonge.  Dieu,  di-ie,  nous  fortifiera  en  telle  sorte,  que  nous  ne  serons  iamais  destituez  de  raison.  Et  c'est  une  doctrine  qui  est  bien  a  noter:  car  qui  est  cause  souvent  que  nous  n'osons  pas  prendre  une  bonne  querelle,  sinon  d'autant  que  nous  n'avons  pas  le  moyen  ni  l'adresse  pour  savoir  resister  constamment,  comme  il  seroit  requis?  Or  afin  qu'une  telle  timidite  n'empesche,  que  nous  ne  soyons  zelateurs  pour  maintenir  la  verite,  comme  il  appartient:  notons  que  Dieu  ne  delaisse  pas  ceux  qui  ont  courage  de  maintenir  les  bonnes  causes:  mais  leur  donne  en  la  fin  la  victoire.  Ouy,  combien  qu'ils  soyent  opprimez  par  cautele,  et  par  astuces  (ainsi  .qu'il  adviendra,  comme  nous  avons  dit)  si  eat-ce  que  iamais  ne  seront  confus,  quoi  qu'il  en  soit.  Confions  nous  donc  en  ceste  promesse,  et  remettons-  nous  a  Dieu,  et  nous  trouverons  que  ceci  n'est  point  dit  en  vain.  Vrai  est  que  devant  toutes  choses  il  nous  faut  bien  discerner  si  la  cause  que  nous  soustenons  est  bonne.  Car  Dieu  punit  la  legerete  de  ceux  qui  entreprennent  une  querelle  sans  savoir  ni  pourquoi  ni  comment:  il  les  laisse  la  bouche  ouverte:  et  faut  qu'ils  demeurent  ridicules,  qu'ils  soyent  mocquez  de  chacun.  Voila  un  iuste  payement  de  ceux  qui  s'avancent  par  trop.  Mais  quand  la  bonte  d'une  cause  nous  sera  cognue,  appuyons  -  nous  sur  ce  qui  nous  est  ici  dit,  c'est  assavoir  que  Dieu  nous  fortifiera  tellement  que  nous  ne  serons  point  vaincus.  Et  au  reste,  quand  nous  verrons  le  plus  souvent  que  ceux  qui  devroyent  maintenir  une  bonne  cause,  font  les  canes,  et  que  quand  ils  pourroyent  avancer  quelque  propos,  ils