34:32  nous  verrons  encores  plus  a  plein.  Auioud'huy  si  un  homme  est  accuse  d'un  crime,  encores  qu'il  en  soit  redargue,  et  mesmes  qu'il  en  soit  tout  convaincu,  il  ne  fera  point  de  conscience  de  dire,  Dieu  m'est  tesmoin  qu'on  me  fait  tort,  on  m'accuse  mal.  Et  comment:  Que  le  nom  de  Dieu  trotte  ainsi?  Les  hypocrites  aussi  quand  ils  se  voudront  magnifier,  ils  diront  tousiours,  Dieu  me  cognoist,  il  sait  qui  ie  suis,  ie  luy  remets  ma  cause.  Et  comment  ceci?  Pensons-nous  que  si  Dieu  dissimule>  quand  on  l'appelle  ainsi  en  tesmoin,  -  comme  a  fauses  enseignes,  et  qu'il  ne  punisse  pas  du  premier  coup  ceux  qui  se  seront  ainsi  mocquez  de  luy,  qu'en  la  fin  il  ne  monstre  pas  ce  qu'il  a  declare  en  sa  Loy,  c'est  assavoir,  qu'il  ne  souffrira  point  que  son  nom  soit  ainsi  prins  en  vain,  qu'il  ne  se  venge  de  l'iniure  qu'on  lui  aura  faite,  quand  on  l'aura  traitte  avec  si  grand  opprobre,  que  de  se  mocquer  ainsi  de  sa  maieste?  Notons  bien  donc  toutes  fois  et  quantes  que  nous  devons  venir  a  Dieu,,  qu'il  faut  bien  que  nous  ayons  examine  nostre  vie  a  l'exemple  de  Iob,  et  qu'il  n'y  ait  pas  ici  une  temerite  pour  nous  ingerer,  pour  dire,  Dieu  m'est  tesmoin:  mais  que  nous  ayons  bien  espluche  nos  consciences,  et  que  Dieu  nous  responde  la  dedans,  qu'il  nous  approuve.  Voila  pour  un  Item.  Or  cependant  nous  avons  aussi  a  noter,  que  quand  tout  le  monde  nous  rendra  tesmoignage:  ce  ne  sera  rien,  iusques  a  ce  que  Dieu  nous  approuve.  Et  par  cela  nous  sommes  admonnestez  de  ne  point  ordonner  nostre  vie  a  quelque  belle  apparence:  comme  nous  voyons  que  le  monde  tousiours  n'a  que  l'ambition.  Si  les  hommes  nous  applaudissent,  et  que  nous  soyons  en  bonne  estime  devant  eux,  il  nous  suffit,  et  voudrions  que  Dieu  s'en  contentast  aussi.  Voire,  mais  il  n'est  point  semblable  aux  hommes  mortels,  comme  l'Escriture  saincte  le  remonstre.  Et  pourquoi?  Nous  voyons  ce  qui  apparoist,  mais  Dieu  sonde  ce  qui  est  cache  au  dedans,  il  regarde  la  verite  et  droiture,  comme  il  en  parle  par  son  Prophete  Ieremie  (5,  3),  ainsi  que  l'autre  passage  est  en  Samuel  (1.  Sam.  16,  7).  Puis  qu'ainsi  est  donc  apprenons  qu'il  ne  nous  faut  point  seulement  avoir  nos  mains  pures,  et  nos  yeux,  et  nos  iambes,  qu'il  ne  faut  point  que  nous  pensions  avoir  beaucoup  fait,  quand  nos  pechez  ne  seront  point  manifestes.  Et  pourquoi?  Le  principal  est,  que  nous  ayons  nostre  tesmoin  au  ciel,  c'est  a  dire  que  Dieu  nous  approuve,  comme  desia  i'ai  declare.  Et  quelle  approbation  aurons-nous  de  Dieu?  C'est  assavoir  si  nous  avons  chemine  en  purete  de  coeur,  qu'il  n'y  ait  point  eu  de  feintise  en  nous,  et  qu'il  n'y  ait  point  eu  seulement  quelque  apparence,  pour  dire,  qu'on  ne  nous  puisse  reprocher  ne  ceci  ne  cela:  mais  que  nous  ayons  eu  une  affection  droite,  que  nous  ayons  continue  en  bien,  que  nous  ayons