29:32  circuits,  que  les  choses  nous  sont  trop  profondes  et  obscures:  car  nostre  Seigneur  nous  masche  par  maniere  de  dire  les  morceaux,  voyant  bien  la  rudesse  qui  est  en  nous  :  et  ainsi  il  nous  traitte  comme  petis  enfans,  afin  que  nous  puissions  avaller  aisement  la  viande  qu'il  nous  donne.  Voila  (di-ie)  comme  quand  nous  aurons  le  parolle  de  Dieu  qui  nous  est  preschee,  qu'il  ne  faut  plus  que  nous  facions  comme  les  papistes,  pour  dire:  O  comment?  cela  est  trop  haut  pour  moy,  cela  n'est  pas  pour  les  simples,  cela  doit  estre  reserve  au  clerge:  sachons  que  Dieu  parle  et  a  grands  et  a  petis,  et  ne  se  mocque  pas  quand  il  nous  convie  a  soy  par  sa  parolle:  mais  il  veut  estre  entendu.  Il  ne  tiendra  donc  qu'a  nous,  si  sa  parolle  nous  est  preschee,  que  nous  ne  soyons  deuement  enseignez  de  ce  qui  est  requis  pour  nostre  salut.  Vray  est  qu'il  ne  nous  y  faut  point  venir  avec  presomption,  nous  confians  en  nostre  prudence:  mais  demandons  a  Dieu  qu'il  nous  esclaire:  et  que  comme  sa  voix  resonne  a  nos  aureilles,  qu'aussi  il  parle  a  nos  coeurs  par  son  S.  Esprit.  Humilions-nous,  comme  nous  savons  qu'il  est  dit  que  Dieu  revele  sa  volonte  a  ceux  qui  sont  petis  et  humbles.  Quand  donc  nous  y  viendrons  en  telle  sorte,  ne  doutons  pas  que  nostre  Seigneur  ne  face  valioir  en  nous  ce  qui  nous  sera  propose  en  son  Nom,  et  que  nous  n'ayons  une  communication  assez  privee  et  facile.  Au  reste  notons  bien  aussi  le  mot  iilssue  dont  parle  ici  Moyse  :  et  que  nous  cognoissions  a  quoy  Dieu  nous  appelle.  Vray  est  qu'il  nous  donne  bien  les  promesses  de  la  vie  presente,  que  nous  devons  estre  asseurez  que  Dieu  ne  nous  deffaudra  point  en  ce  monde,  combien  qu'il  nous  vueille  exercer  par  beaucoup  de  miseres,  que  nous  soyons  agitez  aussi  de  tentations  diverses:  toutesfois  Dieu  dit  qu'il  nous  tiendra  la  main  forte,  et  que  nous  ne  serons  iamais  destituez  de  son  secours  au  besoin.  Mais  le  principal  est  que  nous  cognoissions  l'heritage  qui  nous  est  reserve  aux  cieux,  que  nous  tendions  la,  et  que  nous  y  appliquions  toutes  nos  affections,  que  nous  ne  soyons  point  empeschez  de  ces  choses  basses,  que  tousiours  nous  n'ayons  nos  coeurs  eslevez:  et  que  puis  que  nostre  felicite  et  nostre  thresor  est  la  haut,  nous  ne  soyons  point  retenus  en  ce  monde,  la  ou  il  n'y  a  rien  sinon  transitoire  et  caduque.  Voila  comme  nous  avons  a  noter  ce  mot  d'issue  dont  parle  ici  Moyse.  Car  tous  ceux  qui  cerchent  leur  felicite  ici  bas,  il  est  certain  qu'ils  ne  different  en  rien  des  boeufs  et  des  asnes,  et  mesmes  leur  condition  est  encores  pire.  Car  les  bestes  passent  tousiours  outre,  elles  ne  sont  point  tourmentees  de  tant  de  cupiditez  que  les  hommes:  on  ne  voit  point  la  d'ambition,  on  ne  voit  point  la  d'avarice,  ne  d'autres  telles  cupiditez:  si  elles  ont  soif,  elles  boivent  :  si  elles  ont  faim,  elles  mangent.