10.2:32  Videndum  nobis  est  ne  Christum  hoc  loco  ab  evangelii  ratione  aberrasse  existimemus.  Nam  praeceptis  agere  videtur,  atque  ut  pauperes  simus  *,  mites,  mundo  corde,  pacifici,  praecipere.  Quin  etiam  mercedem  nobis  proponit,  quum  praemiis  nemo  duci  debeat,  sed  gratis  operam  dare  Christo,  solam  Dei  gloriam  quaerere,  nihil  formidine  poenae  aut  gehennae  agere.  Sed  haec  apud  se  cogitant  qui  divinam  philosophiam  per  transennam  tantum  legerunt,  qui  supremis  labris  illam  degustarunt,  qui  in  evangelio  nihil  promoverunt,  qui,  ut  cum  Paulo  dicam,  putantes  se  sapientes  stulti  facti  sunt.  Quin  potius  densissimam  fugat  caliginem,  nos  tenebris  liberat,  ut  qui  corporis  oculos  aliquando  aperuit  nunc  mentis  oculos  aperiat.  Nam  quae  praecepta  non  satis  explicate  Mosi  scripta  erant  *  explicatius  docet.  Itaque  hoc  evangelium  nihil  praecipit,  sed  *  Dei  bonitatem,  misericordiam  et  beneficia  exponit.  Ac  ne  quis  miretur  quod  ||2)  praemia  mercedis  nomine  comprehendat:  Gaudete,  inquit,  quia  merces  vestra  copiosa  est  in  coelis,  aurium  operam  paulisper  nobis  accommodate.  Dei  beneficia  mercedis  nomine  plerumque  significantur,  licet  alia  ratione  nobis  contingant,  nempe  sola  Dei  gratia,  non  nostrarum  virtutum  aut  nostrae  dignitatis  causa.  Verum  quia,  dum  nostra  officia  nostras  virtutes  longe  vincunt,  illis  etiam  satisfaciunt,  mercedis  nomine  continentur.  Quod  si  simili  uti  licet,  rem  totam  multo  dilucidiorem  reddemus:  filius  familias  totis  viribus  patri  placere  nititur,  omnia  sua  officia  in  illum  refert,  sed  non  quae  tanta  sint  ut  haereditatem  mereantur,  quam  nihilominus  accipit,  mercedemque  adpellare  possis,  non  quod  debita  sit  sed  quod  filii  erga  patrem  officia  plus  satis  compenset.  Ita  merces  in  sacris  plerumque  usurpari  solet.  Alias  quis  intelligat  vitam  aeternam  mercedem  ?  Quis  tam  mentis  expers  ut  vitam  aeternam  nostris  benefactis  deberi,  aut  nostra  benefacta  digna  esse  vita  aeterna  existimet  atque  affirmet?  Omnibus  igitur  sit  in  confesso,  Christum  hoc  evangelii  loco,  ut  reliquis  omnibus,  suam  gratiam,  suam  beneficentiam  ante  oculos  ponere,  ut  lex  sit  intelligenda,  docere  Mosem  germane  interpretari.  Sed  Matthaeum  audiamus.  Quum  vidisset  Iesus  turbas  ascendit  in  montem,  et  quum  sedisset  accesserunt  ad  eum  discipuli,  et  aperiens  os  suum  docebat  illos  dicens:  Beati  pauperes  spiritu.  Attendite,  quaeso,  viri  christiani,  ac  singulare  Dei  erga  nos  beneficium  considerate.  Nos  in  tenebris  diutius  dormire  non  sinit,  sed  somno  profundo  nos  excitat,  inchoata  et  rudia  expolit  et  perficit.  Praeceptum  erat  antiquis  ne  deos  haberent  alienos:  quod  quum  in  summa  versarentur  rerum  ignoratione,  spiritusque  expertes  essent,  intelligendum  censuerunt  de  2)  Hic  subsistit  fragmentum  Genevense.