1:32  [CO  1.  32]  praeterea  revocans,  quam  magnifice  virtutem  suam  ac  potentiam  exeruerit,  cum  Israeliticum  populum  e  servitio  Pharaonis  et  Aegyptiorum  in  libertatem  asseruit.  Quam  eandem  quotidie  exerit,  dum  electos  suos,  qui [p. 52]  veri  sunt  Israelitae,  e  peccatorum  servitute,  quae  sub  Aegypti  nomine  figuratur,  eximit,  dum  extrahit  e  vinculis  diaboli,  qui  spiritualis  est  Pharao,  Aegyptiorum  Dominus,  eorum  scilicet,  qui  in  concupiscentiis  suis  ambulant.  Subiicit  deinde  mandatum  primum  in  hanc  formam:  MANDATUM  I.  Non  habebis  Deos  alienos  coram  me.  Quo  prohibemur  alio  avertere  fiduciam,  quae  in  eo  tota  posita  esse  debet,  alio  ad  opem  quaerendam  confugere,  alio  cuiusvis  boni  et  virtutis  laudem  transferre,  quae  solius  eius  esse  debet  (Ies.  30  et  31.  Ier.  2).  Quin  potius  ipsum  sic  a  nobis  super  omnia  timeri  et  amari  oportet,  ut  solum  pro  Deo  nostro  agnoscamus,  omnem  spem  ac  fiduciam  nostram  in  ipso  defigentes  (1  Tim.  1.  Deut.  6.  10);  cogitantes,  quidquid  boni  nobis  accidit  ab  ipso  esse,  nihil  omnino  admittentes,  nisi  in  quo  honoretur  ac  colatur  (1  Cor.  10).  Nec  solum  hoc  agendum  est,  ut  lingua  et  corporis  gestu,  omnique  exteriori  significatione  non  alium  esse  nobis  Deum  declaremus,  verum  ut  etiam  mente,  toto  corde,  toto  studio  tales  nos  praestemus.  Non  enim  verba  modo  nostra  externaque  opera  coram  ipso  sunt,  verum  penitissimi  cordis  recessus,  ac  intimae  cogitationes  animi,  melius  atque  certius  ipsi  patent,  quam  nobis  ipsis  (1  Par.  28). [p. 53]  MANDATUM  II.  Non  facies  tibi  sculptile,  neque  similitudinem  aliquam  eorum  quae  sunt  in  coelo  sursum,  vel  in  terra  deorsum,  vel  in  aquis  quae  sub  terra  sunt,  non  adorabis  ea  neque  coles.  Quo  significatur,  cultum  omnem  atque  adorationem  deberi  uni  Deo.  Qui  cum  sit  incomprehensibilis,  incorporeus,  [OS  43]  invisibilis,  sicque  omnia  contineat,  ut  nullo  loco  concludi  possit;  ne  somniemus  figura  aliqua  exprimi  posse,  aut  quovis  simulacro  repraesentari,  nec  idolum,  quasi  Dei  similitudo  esset,  veneremur;  quin  potius  adoremus  Deum,  qui  spiritus  est,  in  spiritu  et  veritate  (Deut.  6.  10.  1  Reg.  8.  Ioan.  1.  1  Tim.  1.  Ioan.  4).  Primum  ergo  mandatum,  unum  esse  Deum  tradit,  praeter  quem  nulli  alii  dii  cogitandi  aut  habendi  sint.  Istud  qualis  ipse  ille  sit,  docet,  et  quo  cultus  genere  honorandus,  ne  quid  illi