5:319  CATECHISMUS.  sonarum  trinitatem  plusquam  evidenter  designari  agnoscimus.  Iam  vero  confessionem,  solenni  iureiurando  ab  universo  populo  editam,  non  sine  ratione  adiungendam  curavimus.  Nempe  ut  si  quopiam  temerarius  de  hac  re  fuerit  delatus  rumor,  cuius  non  levem  auram  sentire  coepimus,  ne  (ut  usu  venire  solet,  quum  res  ad  liquidum  comperta  non  est)  sint,  qui  nos  quippiam  novo  exemplo  esse  admolitos  suspicentur:  quod  senatui  nostro  fuimus  autores  sacramenti  istius  exigendi.  Equidem  facti  nostri  aequitatem  clarius  elucere  arbitramur,  quam  ut  defensione  ulla,  saltem  apud  cordatos  prudentesque  viros,  opus  habeat.  Atqui  ne  sic  quidem  quorundam  criminationes  effugere  potuit.  Tanta  est  imperitiae  morositas,  ut  vel  in  rebus  probatissimis,  habeat  semper  quod  reprehendat.  Nos  ergo  qui  officii  nostri  esse  ducimus,  omnibus  quantum  in  nobis  est,  satisfacere:  paucis  indicabimus  quam  solida  nobis  istius  consilii  ratio  constet.  Quanquam  post  abominationem  papismi,  verbi  virtute  hic  prostratam,  senatusconsulto  edictum  fuerat,  ut  sublatis  superstitionibus,  earumque  instrumentis,  ad  evangelii  puritatem  urbis  religio  componeretur:  nondum  tamen  ea  exstare  nobis  videbatur  ecclesiae  facies,  quam  legitima  muneris  nostri  administratio  requireret.  Utcunque  enim  aestiment  alii,  nos  certe  functionem  nostram  adeo  exiguis  finibus  terminatam  non  putamus,  ut  concione  habita,  ceu  persoluto  penso,  conquiescere  liceat.  Propius  multo  ac  vigilantiore  opera  curandi  sunt,  quorum  sanguis,  si  desidia  nostra  perierit,  a  nobis  reposcetur.  Si  quando  autem  alias  nos  anxios  habebat  haec  sollicitudo,  tum  vero  acerrime  urebat  ac  discruciabat,  quoties  distribuenda  erat  Domini  coena.  Quum  enim  multorum  dubia  nobis  foret,  et  maxime  etiam  suspecta  fides,  omnes  tamen  promiscue  irrumpebant.  Et  illi  quidem  iram  Dei  vorabant  potius,  quam  vitae  sacramentum  participabant.  Atqui  an  non  ipse  quoque  pastor  tantum  mysterium  profanare  credendus  est,  qui  delectum  in  eo  communicando  nullum  habet?  Quare  non  alia  lege  pacem  ac  quietem  obtinere  cum  nostris  ipsorum  conscientiis  potuimus,  quam  ut  solenni  professione  nomen  Christo  darent,  qui  in  eius  populo  censeri,  atque  ad  spirituale  sacrosanctumque  illud  epulum  admitti  vellent.  Id  in  baptismo,  inquiunt,  semel  factum  fuerat.  Sed  nemo  non  defecerat  a  baptismi  professione.  Si  militiae  desertori  primum  sacramentum,  quod  perfidia  sua  violavit,  sufficere  autumant,  verbum  pro  causae  nostrae  patrocinio  non  faciemus.  Sin  ipse  quoque  sensus  communis  aliud  dictat,  omni  calumnia  liberamur.  Neque  vero  aut  illustribus  exemplis,  aut  scripturae  etiam  suffragio  destituimur.  Circumcisionis  foedus  habebat  in  corpore  suo  impressum  populus,  quem  ad  novum  foedus  paciscendum  Moses  exhortatus  est.  Eadem  foederis  renovatio  a  sanctis  regibus  Iosia  et  Asa  eximiis