49:319  319  EPIST.  PAULI  AD  CORINTHIOS  I  320  et  eorum  pseudoapostolos,  quod  gaudendum  sit  servo  Domini  ab  opere  bono  alioqui  et  laudabili  se  abstinuisse,  ne  illis  in  occasionem  noxae  verteretur.  17.  Non  enim  misit  me  Christus.  Occupat  quod  illi  forte  obiici  potuisset:  non  fuisse  igitur  suo  munere  defunctum,  quia  iubeat  Christus  apostolos  baptizare  non  secus  ac  docere.  Respondet  igitur,  has  non  fuisse  praecipuas  functionis  suae  partes:  sibi  enim  docendi  munus  praecipue  esse  iniunctum,  cui  incumberet.  Nam  quum  dicit  Christus  apostolis:  Ite,  praedicate,  et  baptizate:  baptismum  adiungit  doctrinae,  tanquam  accessionem  duntaxat,  vel  appendicem:  ut  semper  doctrinae  prior  locus  maneat.  Duo  tamen  hic  sunt  observanda:  quorum  alterum  est,  non  hic  simpliciter  negare  apostolum  quin  baptizandi  mandatum  haberet  (nam  ad  omnes  apostolos  hoc  pertinet  Ite,  baptizate:  et  ipse  temere  fecisset  vel  unum  baptizando,  nisi  mandato  fuisset  instructus),  sed  tantum  indicare  quid  esset  in  sua  vocatione  praecipuum.  Secundum  vero,  minime  hic  sacramenti  dignitatem  aut  fructum  extenuari,  quemadmodum  quidam  putant.  Neque  enim  hic  de  virtute  baptismi  quaestio  est:  nec  ideo  hanc  comparationem  instituit  Paulus,  ut  quidquam  de  ea  detrahat:  sed  quum  paucorum  esset  docere,  pluribus  autem  baptizare  datum  foret:  deinde  quum  multi  simul  doceri  possent,  baptismus  autem  non  nisi  singulis  ordine  posset  conferri,  Paulus,  qui  docendi  facultate  antecellebat,  instabat  operi  sibi  magis  necessario:  aliis  relinquebat  quod  praestare  commodius  poterant.  Imo  si  propius  expendant  lectores  omnes  circumstantias,  videbunt  subesse  tacitam  ironiam,  qua  facete  mordentur  qui  ex  labore  alieno  sub  praetextu  caeremoniae  gloriolam  venantur.  Incredibiles  fuerant  labores  Pauli  in  ecclesia  illa  aedificanda:  supervenerant  delicati  isti  magistri,  qui  aquae  adspersione  discipulos  in  suam  sectam  traxerant:  Paulus  ergo,  titulum  honoris  illis  concedens,  se  onere  contentum  esse  testatur.  Non  in  sapientia  sermonis.  Anticipatio  est,  qua  duplex  obiectio  refellitur.  Nam  et  excipere  poterant  larvati  doctores,  Paulum,  qui  nulla  facundia  praeditus  erat,  ridicule  iactare  sibi  iniunctas  esse  docendi  partes:  ideo  per  concessionem  dicit,  se  non  creatum  esse  rhetorem,  qui  verborum  splendore  se  venditet,  sed  ministrum  spiritus,  qui  rudi  et  plebeio  sermone  mundi  sapientiam  in  ordinem  cogat  Iam  ne  quis  obiiceret,  praedicatione  non  minus  quam  alios  baptismo  eum  aucupari  gloriam,  breviter  respondet:  quum  ab  omni  splendore  remota  sit  docendi  methodus  quam  tenet,  ac  nihil  ambitionis  spiret,  non  posse  hoc  nomine  suspectam  esse.  Atque  hinc  quoque  (nisi  me  fallit  opinio)  colligere  promptum  est,  quis  fuerit  praecipuus  controversiae  status,  quam  habebat  Paulus  cum  malis  et  infidelibus  ministris  Corinthiorum:  nempe  quum  turgerent  ambitione,  quo  plebem  raperent  in  admirationem  sui,  verborum  pompa  et  humanae  sapien-