51:318  Mais  encores  nous  faut-il  bien  observer  les  mots  dont  sainct  Paul  use:  car  il  dit  que  le  Dieu  de  nostre  Seigneur  Iesus  Christ,  Pere  de  gloire,  ou  Pere  glorieux  (car  ce  mot  de  Pere  de  gloire,  est  prins  en  la  langue  Hebraique  pour  pere  glorieux)  que  celuy-la  (dit-il)  vous  donne  ceste  revelation  spirituelle  pour  avoir  cognoissance  de  luy.  Or  ici  quand  sainct  Paul  nous  ramene  a  Iesus  Christ,  disant  que  le  Dieu  qu'il  invoque,  est  celuy  qui  est  Dieu  de  nostre  Seigneur  Iesus  Christ,  et  Pere,  c'est  pour  monstrer  la  fiance  qu'il  a  d'estre  exauce:  et  aussi  que  les  Ephesiens  prennent  courage,  et  qu'ils  ensuyvent  ceste  forme  et  ceste  reigle  de  prier,  quand  ils  ont  a  s'adresser  a  Dieu,  qu'ils  tiennent  son  chemin,  efc  qu'ils  ayent  ceste  droire  ligne  de  venir  a  nostre  Seigneur  Iesus  Christ.  Or  maintenant  si  on  demande  comment  Dieu  est  par  dessus  nostre  Seigneur  Iesus  Christ,  ceste  question  sera  aisement  solue,  quand  nous  regarderons  la  personne  du  Mediateur,  qui  s'est  abaisse  en  nostre  lieu  et  degre  pour  estre  moyen  entre  Dieu  et  nous.  Il  est  vray  que  Iesus  Christ  est  un  avec  son  Pere:  et  quand  nous  parlons  du  Dieu  vivant,  il  nous  faut  recognoistre  que  toute  plenitude  de  divinite  habite  en  luy.  Il  ne  faut  point  donc  separer  nostre  Seigneur  Iesus  Christ  comme  s'il  estoit  un  Dieu  nouveau  et  qu'il  fust  un  autre  que  celuy  qui  s'est  declare  des  le  commencement  aux  Peres  (comme  des  diables  auiourd'huy  ont  remue  ceste  vilenie  et  abomination  si  puante)  mais  voila  un  seul  Dieu  qui  s'est  declare  a  nous  en  la  personne  du  Pere,  moyennant  que  nous  le  cerchions  en  Iesus  Christ.  Car  en  Iesus  Christ  nous  avons  a  considerer  l'office  de  moyenneur,  quand  il  s'est  ainsi  abaisse:  non  point  qu'il  ait  rien  quitte  de  sa  maieste,  ne  qu'il  soit  amoindri  ou  diminue  en  sa  gloire  eternelle:  rien  de  tout  cela  :  mais  a  nostre  regard  il  a  este  amoindri,  voire  aneanti  du  tout.  Et  ne  faut  point  avoir  honte  de  dire  que  Iesus  Christ  ait  este  amoindri,  quand  il  est  dit  qu'il  a  este  aneanti  :  car  voila  le  propre  mot  dont  use  sainct  Paul  aux  Philippiens.  Quand  donc  nous  parlons  de  Iesus  Christ  selon  qu'il  s'est  conioint  a  nous,  a  fin  de  nous  amener  a  Dieu  son  Pere,  voila  comme  il  est  au  dessous  de  Dieu  son  Pere,  voire  selon  qu'il  a  prins  nostre  nature,  qu'il  s'est  fait  nostre  compagnon.  Et  voila  pourquoy  aussi  il  disoit  a  ses  disciples  (comme  sainct  Iean  le  recite  au  vingtieme  chapitre),  Allez  vous  en  a  mes  freres,  et  leur  dites,  Ie  m'en  vay  a  mon  Dieu  et  a  vostre  Dieu,  a  mon  Pere  et  a  vostre  Pere.  Voila  Iesus  Christ  qui  se  conioint  tellement  avec  ses  fideles,  qu'il  dit  qu'il  veut  avoir  un  mesme  Dieu  avec  eux.  Voire,  et  en  quelle  sorte?  Car  n'est-il  pas  Dieu  luj-mesme?  Ouy:  mais  pource  qu'il  a  vestu  nostre  chair,  et  entant  qu'il  a  voulu  estre  fait  chair,  a  fin  que  nous  fussions  membres  de  son  corps,  voila  pourquoy  il  a  un