29:318  torum,  helluonum,  scortatorum,  denique  ad  omne  flagitium  proclivium  hominum  consortio  educatus,  tamen  inpollutus  a  Deo  conservatur,  annon  specialis  gratiae  testimonium  istud  longe  est  excellentius  atque  commendabilius  quam  si  melior  institutio  ei  contigisset?  Hinc  discamus,  nobis  Deo  servire  cupientibus,  diabolum  multa  ante  oculos  obiecturum,  quibus  a  proposito  dimoveamur,  nisi  in  sancto  proposito  firmiter  perseveremus.  Nihil  aggredi,  inquam,  aut  suscipere  unquam  nos  posse  certum  est  ad  Dei  gloriam,  quin  reluctantem  variaque  impedimenta  suscitantem  diabolum  experiamur.  Quare  discamus  nullis  terriculis  a  proposito  dimoveri:  sed  Elcanae  exemplum  imitantes  quoscunque  casus  superare:  atque  adeo,  si  forte  nos  in  flagitiosos  et  improbos  homines  incidere  contigerit,  Deo  nos  commendare,  ut  quemadmodum  Samuelem,  ita  et  nos  spiritus  sui  gratia  et  virtute  protegat,  ne  unquam  malis  exemplis  in  ultimum  exitium  pertrahamur,  nostramque  infirmitatem  nos  magis  atque  magis  edoceat,  ut  tanto  ardentius  et  cum  maiore  sollicitudine  ad  ipsum  confugiamus.  Absit  autem  occasionem  hinc  inde  discurrendi,  et  consortia  quaevis  quibus  ad  vitia  sollicitentur  frequentandi,  putemus  oblatam:  sed  potius  admoneri,  ut  si  forte  nos  incauti  pro  angelis  et  religiosis  hominibus  in  flagitiosos  inciderimus,  tum  ad  Deum  confugiamus,  atque  eius  in  nos  gratiam  et  beneficentiam  speremus,  certo  persuasi  fore  ut  nunquam  ipse  nos  permittat  pravis  consortiis  infici,  atque  in  ultimum  exitium  pertrahi.  Caeterum  quum  hic  filii  Heli  dicuntur,  filii  Belial,  id  est  nequam  et  flagitiosi,  ne  leve  quoddam  illorum  vitium  existimemus,  quemadmodum  nemo  inter  mortales  sine  crimine  vivit,  quod  nunquam  eam  quae  requiritur  perfectionem  assequamur:  sed  potius  notari  quandam  insignem  improbitatem,  atque  Dei  contemptum  teneamus.  Vox  enim  illa  Belial,  depravatos  et  inemendabiles  designat,  qui  nullo  pudore  moverentur,  nullo  Dei  metu  retinerentur,  sed  Dei  et  hominum  contemptores  pudorem  omnem  atque  metum  abiecissent.  Non  ergo  tantum  flagitiosos  et  improbos  fuisse  Heli  filios,  ut  multos  videas  ad  quaevis  vitia  proclives,  sed  in  malitia  confirmatos  frontem  ad  omne  scelus  perfricuisse,  pudoremque  omnem  abiecisse  sciamus,  atque  emendationis  nullum  signum  dedisse.  Quantum,  quaeso,  toti  populo  offendiculum,  sacerdotes,  proxime  ad  Deum  accedentes,  et  pro  populo  intercedentes,  atque  adeo  Domini  nostri  Iesus  Christi  figuras,  tamen  omnis  flagitii,  malitiae,  perversitatis  atque  confusionis  esse  conscios?  Quare  cavendum  summopere  ne  hominum  autoritate  a  recta  via  unquam  dimoveamur,  illis  quos  viae  duces  esso  decuerat,  ad  quaelibet  flagitia  nos  suo  exemplo  invitantibus.  Nam  si  a  mortalibus  fides  nostra  penderet,  quam  infirmo  fulcro,  quaeso,  niteretur?  Quamobrem  licet