25:318  obstrepere,  ne  sacrilegam  nostram  audaciam  et  temeritatem  damnando,  se  ipsum  absolvat  Peccarunt  autem  Israelitae,  quod  quum  ministri  tantum  essent  vindictae  Dei,  non  fuit  in  eorum  arbitrio  quidquam  laxare.  Quod  notatu  dignum  est,  ut  quicunque  sunt  gladio  armati  ne  tantillum  quidem  huc  vel  illuc  declinent,  quin  fideliter  exsequantur  quidquid  Deus  praescribit.  Quod  iracundia  Mosis  laudatur,  inde  refellitur  Stoicorum  commentum,  apud  quos  artoi&ua  summa  est  virtus.  Atqui  potius  elaborandum  est  ut  nascantur  omnes  nostri  affectus  ex  bona  causa  :  deinde  fraenentur  ex  moderatione,  ne  qua  ebulliat  carnis  intemperies,  sed  palmam  teneat  spiritualis  zelus.  Caeterum  rationem  affert  Moses  cur  mulieribus  nihilo  magis  parcendum  fuerit  quam  viris:  quia  se  prostituerint  ad  stuprum,  quo  exitiales  laqueos  tenderent  Israelitis."  Quantum  ad  parvulos  spectat,  non  eadem  valuit  ratio,  quia  nullius  criminis  fuerant  conscii:  sed  minime  dubium  est  quin  iuste  voluerit  Deus  impiae  et  desperatae  gentis  nomen  penitus  exstinctum:  sicuti  postea  gentes  Chanaan  una  cum  sobole  exitio  addixit.  Quaeritur  autem  qua  nota  discerni  potuerint  a  virginibus  mulieres  quae  iam  virilem  concubitum  erant  expertae.  Iudaei  fabulam  suo  more  fingunt,  quum  probabile  sit  nonnisi  ex  aetate  factum  esse  iudicium.  19.  Vos  vero  manete.  Si  quis  cadaver  tetigerat,  alibi  vidimus  immundum  censeri:  nunc  Moses  expiandi  ritum  ad  caedes  legitimas  extendens,  admonet  quantopere  abstinendum  sit  ab  humano  sanguine  fundendo.  Israelitas  strenue  grassari  oportuit  per  medias  caedes  sed  quia  cum  ordine  naturae  quodammodo  pugnat,  homines  ab  hominibus  occidi,  ac  si  in  propria  viscera  saevirent,  etiam  in  iustis  poenis  quaedam  vestigia  humanitatis  restare  Deus  voluit  quae  omnem  crudelitatem  in  genere  cohiberent.  Nec  abs  re  scriptura  ubi  heroicam  fortitudinem  commendat,  hac  loquendi  forma  utitur,  polluisse  manus  suas  sanguine  qui  hostes  suos  straverunt  ;  nempe  ut  caedes  quaslibet  exhorreamus,  quasi  generis  humani  conservationi  adversas.  Quamvis  ergo  Israelitae  non  iure  modo  occiderint  Madianitas,  sed  ex  Dei  mandato,  ne  tamen  promiscue  ad  fundendum  Dei  sanguinem  se  assuefaciant,  iubentur  se  purgare  die  tertia  et  septima,  antequam  redeant  in  castra,  ne  contagio  populum  inficiat.  Diversa  est  praedae  ratio,  quia  vasorum  immundities  admonuit  detestabilem  esse  illum  populum  cuius  supellex,  donec  purgata  esset  igni,  vel  aqua,  solo  contactu  omnes  polluebat.  Caeterum  ne  vel  parere  detrectent  milites,  vel  inviti  cedant,  in  memoriam  revocat  Eleazar,  nihil  ab  illis  nunc  aliud  exigi  quam  veteris  praecepti  observationem.  Nec  dubium  est  quin  istas  docendi  partes  consulto  Moses  resignaverit  nepoti  suo,  quia  in  posterum  ex  ore  sacerdotis  petenda  erat  legis  interpretatio.