1:318  quousque  id  extendatur  nesciunt,  nos  vim  vocis  prius  excutiamus,  tum  ex  scripturae  simplicitate  exsequamur  quid  suapte  natura  homo  ad  bonum  aut  malum  polleat.  Liberum  arbitrium  quid  esset,  quum  in  omnium  scriptis  identidem  occurrat,  pauci  definierunt.  Videtur  tamen  Origenes  1)  id  de  quo  passim  inter  eos  conveniebat  posuisse,  quum  dixit:  facultatem  esse  rationis  ad  bonum  malumve  discernendum;  voluntatis  ad  utrumvis  eligendum.  Nec  ab  eo  variat  Augustinus,  quum  docet  facultatem  esse  rationis  et  voluntatis,  qua  bonum  eligitur  gratia  assistente,  malum  ea  desistente.  Obscurius  Bernardus,  dum  vult  argute  loqui,  qui  ait  esse  consensum,  ob  voluntatis  inamissibilem  libertatem  et  rationis  indeclinabile  iudicium.  Nec  satis  popularis  Anselmi  definitio,  qui  tradit  esse  potestatem  servandi  rectitudinem  propter  se  ipsam.  Itaque  Petrus  Lombardus  2)  et  Scholastici  Augustini  definitionem  magis  amplexi  sunt,  quia  et  apertior  erat  et  gratiam  Dei  non  excludebat,  sine  qua  voluntatem  sibi  per  se  non  sufficere  videbant.  Sua  tamen  et  ipsi  afferunt,  sive  quae  meliora  esse,  sive  quae  facere  putabant  ad  maiorem  explicationem.  Principio  consentiunt  nomen  arbitrii  magis  ad  rationem  referendum,  cuius  est  discernere  inter  bona  et  mala;  epithetum  liberi,  ad  voluntatem  proprie  pertinere,  quae  ad  utrumque  flecti  possit.  Quare  quum  libertas  proprie  voluntati  conveniat,  Thomas  optime  quadrare  dicit,  3)  si  liberum  arbitrium  dicatur  vis  electiva,  quae  mixta  quidem  ex  intelligentia  et  appetitu  magis  tamen  ad  appetitum  inclinet.  Iam  habemus  in  quibus  sita  sit  vis  liberi  arbitrii:  in  ratione  scilicet  et  voluntate.  Nunc  videre  restat  quantum  illi  tribuendum  sit.  24.  Communiter  solent  res  medias,  quae  scilicet  nihil  ad  regnum  Dei  pertinent,  sub  libero  hominis  consilio  ponere;  veram  autem  iustitiam,  ad  specialem  Dei  gratiam  et  spiritualem  regenerationem  referre.  Quod  dum  vult  ostendere  autor  operis  de  vocatione  gentium,  triplicem  voluntatem  numerat:  4)  primam  sensitivam,  alteram  animalem,  tertiam  spiritualem;  quarum  priores  duas  homini  liberas  esse  tradit,  ultimam  opus  esse  spiritus  sancti  in  homine.  Quod  an  verum  sit,  suo  loco  tractabitur;  nunc  enim  recensere  breviter  aliorum  sententias,  non  refellere  propositum  est.  Hinc  fit  ut,  quum  de  libero  arbitrio  agunt  scriptores,  non  quid  civiles  seu  externas  actiones,  sed  quid  ad  divinae  legis  obedientiam  valeat,  in  primis  requirant.  Quam  posteriorem  quaestionem  sic  praecipuam  esse  fateor,  ut  illam  arbitrer  non  prorsus  negligendam.  Cuius  sententiae  spero  me  optimam  rationem  redditurum.  Obtinuit  autem  in  scholis  distinctio  quae  triplicem  li-  1)  Lib.  tertio  περὶ  ἀρχῶν.  2)  Lib.  2.  sentent.  dist.  24.  3)  Parte  1.  quaest.  83.  art.  3.  4)  Lib.  1.  c.  2.