52:317  317  CAPUT  V.  318  eorum  existimatio  (quodj  tamen  ipsum  perquam  indignum  est  in  tam  honesto  ordine),  sed  detrahitur  autoritas  sacrosanctae  Dei  doctrinae.  Atque  id  praecipue  (ut  dixi)  molitur  Satan.  Neque  enim  hic  tantum  valet  illud  Platonis,  malignum  esse  vulgus,  ac  praestantioribus  invidere:  sed  quo  sincerius  quisque  pastorum  promovere  studet  regnum  Christi,  eo  maiore  oneratur  invidia,  et  proterviores  adversus  eum  fiunt  insultus.  Iam  vero  simulatque  aliqua  de  verbi  ministris  criminatio  exiit,  perinde  ac  si  iam  convicti  forent,  certa  fide  excipitur.  Id  accidit  non  tantum  quia  maior  ab  illis  exigitur  integritas:  sed  quia  plerosque  fere  omnes  Satan  ad  nimiam  credulitatem  instigat,  ut  nulla  inquisitione  habita  cupide  damnent  suos  pastores,  quorum  tueri  famam  potius  debuerant.  Ergo  tantae  iniquitati  non  frustra  se  Paulus  opponit:  ac  prohibet  subiici  improborum  maledicentiae  presbyteros,  donec  legitimis  testimoniis  sint  convicti.  Neque  enim  mirum  est  si  multos  habeant  hostes,  quorum  officium  est,  omnium  vitia  reprehendere,  pravis  omnium  cupiditatibus  adversari,  severitate  sua  cohibere  quoscunque  errare  vident.  Quid  ergo  fiet  si  promiscue  audientur  quaecunque  de  illis  sparsae  fuerint  calumniae?  20.  Peccantes  argue  coram  omnibus.  Quoties  bonis  cavetur,  hoc  mali  ad  immunitatem  suam  arripiunt.  Itaque  quod  de  repellendis  iniustis  accusationibus  dixerat  Paulus,  sic  temperat  hac  sententia,  ne  cui  tamen  impune  hoc  praetextu  peccare  liceat.  Et  sane  videmus  quantis  et  quam  multiplicibus  privilegiis  suum  clerum  munierit  papatus:  ut  quum  nequissime  vivant,  sint  tamen  ab  omni  reprehensione  immunes.  Certe  si  cautiones  observentur,  quas  colligit  Gratianus  causa  secunda,  quaest.  4,  item  qu.  7,  non  erit  periculum  ne  unquam  ad  reddendam  vitae  rationem  cogantur.  Ubi  enim  septuagintaduo  testes  reperientur,  quos  in  episcopo  damnando  requirit  putidum  edictum  sub  nomine  Sylvestri  ?  Deinde  quum  totus  laicorum  ordo  ab  accusatione  arceatur,  in  clero  etiam  minores  maioribus  prohibeantur  molestiam  facessere:  quid  impedit  quominus  securi  iudicia  omnia  rideant?  Proinde  sedulo  haec  moderatio  tenenda  est,  ut  coerceantur  linguae  petulantes,  ne  fictis  criminibus  presbyteros  infament:  et  tamen  ut  quisquis  inter  eos  male  se  geret,  severe  corrigatur.  Nam  de  presbyteris  hoc  dictum  accipio,  palam  arguendos  esse  qui  dissolute  vivunt.  Quare?  ut  reliqui,  dum  ne  illis  quidem  parci  vident  qui  gradu  et  dignitate  sunt  superiores,  tali  exemplo  moniti,  magis  timeant.  Nam  sicuti  honestae  vitae  exemplo  praeire  aliis  debent  presbyteri  :  ita  si  delinquunt,  severitatem  disciplinae  exerceri  erga  ipsos  convenit,  quae  omnibus  sit  exemplo.  Cur  enim  plus  illis  indulgeatur  licentiae,  quorum  peccata  longe  gravius  quam  aliorum  nocent?  Intellige  autem  quod  dicit  Paulus  de  sceleribus  aut  flagitiosis  peccatis,  quae  publicum