47:317  317  CAPUT  XIII.  318  Nam  in  Christi  cruce,  quasi  in  splendidissimo  theatro,  incomparabilis  Dei  bonitas  toti  mundo  spectata  fuit.  Sursum  quidem  et  deorsum  in  omnibus  creaturis  relucet  Dei  gloria,  sed  nunquam  illustrior  alibi  fuit  quam  in  cruce,  in  qua  admirabilis  facta  est  rerum  conversio,  ostensa  omnium  hominum  damnatio  fuit,  abolitum  peccatum,  reddita  hominibus  salus,  toto  denique  mundo  reparato  omnia  in  ordinem  restituta.  Quanquam  autem  particula  in  saepe  accipitur  pro  hebraico  beth  ac  tunc  idem  valet  atque  per,  malui  tamen  simpliciter  vertere.  Deum  in  filio  hominis  glorificatum.:  quia  loquutio  videbatur  magis  emphatica.  Quum  dicit  et  glorificatus  est  Deus,  copula  et  in  causalem  particulam  meo  iudicio  resolvi  debet.  32.  Si  Deus  glorificatus  est.  Colligit  Christus  se  gloriosum  triumphum  relaturum  esse  ex  morte  :  in  qua  hoc  unum  propositum  habet,  ut  glorificet  patrem  suum.  Neque  enim  pater  gloriam  suam  ita  quaesivit  ex  morte  filii,  quin  ipsum  faceret  eiusdem  gloriae  participem.  Mox  igitur  fore  promittit,  ut  deleta  ignominia,  quam  ad  breve  momentum  subiturus  erat,  magnificum  eniteat  in  morte  sua  decus,  quod  etiam  impletum  est.  Adeo  enim  non  obscurat  Christi  dignitatem  mors  crucis  quam  perpessus  est,  ut  illic  maxime  refulgeat,  quatenus  scilicet  illic  incredibilis  eius  amor  erga  humanum  genus,  immensa  eius  iustitia  in  expiando  peccato  et  ira  Dei  placanda,  mirifica  eius  virtus  in  vincenda  morte,  Satana  subigendo,  coelis  denique  aperiendis  plenum  fulgorem  emisit.  Iam  ad  nos  etiam  omnes  extenditur  haec  doctrina,  quia  etsi  totus  mundus  in  nostram  infamiam  conspiret,  si  tamen  sincere  et  ex  animo  servire  Dei  gloriae  studuerimus,  dubitandum  non  est  quin  ipse  vicissim  nos  glorificet.  Consolationem  auget  Christus  a  temporis  brevitate,  quum  hoc  continuo  fore  promittit.  Porro  tametsi  gloria  haec  a  die  resurrectionis  coepit,  hic  tamen  maxime  notatur,  quae  continuo  post  sequuta  est  eius  propagatio,  quum  mortuos  suscitans  evangelii  et  spiritus  sui  virtute  novum  sibi  populum  creavit.  Proprium  enim  mortis  Christi  decus  est  fructus,  qui  inde  manavit  in  salutem  hominum.  33.  Filioli,  adhuc  paululum.  Quia  fieri  non  poterat  quin  gravissimo  moerore  discipulos  afficeret  magistri  discessus,  ideo  mature  praemonet  se  non  futurum  cum  illis  diutius,  simulque  hortatur  ad  patientiam.  Postremo,  ut  tollat  intempestivum  desiderii  ardorem,  eos  negat  statim  posse  sequi.  Filiolos  vocando  blanda  ista  appellatione  non  ideo  se  ab  illis  migrare  docet,  quia  minus  curet  eorum  salutem,  quum  tenerrime  ipsos  amet.  Induit  quidem  carnem  nostram  in  hunc  finem  ut  frater  noster  sit,  sed  in  illo  altero  nomine  maior  amoris  vehementia  exprimitur.  Quod  se  apud  eos  repetere  dicit  quod  ante  Iudaeis  dixerat,  est  quidem  id  verum  quoad  verba,