1:317  CAP.  II.  DE  COGNITIONE  HOMINIS.  A  24;  B  22;  C  22.]  occasionem  praeberent.  Ergo  ne  quid  communi  hominum  iudicio  absurdum  traderent,  scripturae  doctrinam  cum  philosophiae  dogmatibus  dimidia  ex  parte  conciliare  studuerunt.  Praecipue  tamen  secundum  illud  spectasse,  ne  desidiae  locum  facerent,  ex  eorum  verbis,  apparet.  Habet  Chrysostomus  alicubi:  1)  quoniam  bona  et  mala  in  nostra  Deus  potestate  posuit,  electionis  liberum  donavit  arbitrium,  et  invitos  non  retinet  sed  volentes  amplectitur.  Item:  2)  saepe  qui  malus  est  si  voluerit,  in  bonum  mutatur;  et  qui  bonus,  per  ignaviam  excidit  et  fit  malus;  quia  liberi  arbitrii  esse  nostram  naturam  fecit  Dominus,  nec  imponit  necessitatem,  sed  congruis  remediis  appositis  totum  iacere  in  aegrotantis  sententia  sinit.  Item:  3)  sicut,  nisi  gratia  Dei  adiuti,  nihil  unquam  possumus  recte  agere;  ita,  nisi  quod  nostrum  est  attulerimus,  non  poterimus  supernum  acquirere  favorem.  Dixerat  autem  prius,  ut  non  totum  divini  sit  auxilii,  simul  nos  aliquid  afferre  oportet.  Adeoque  verbum  hoc  illi  passim  familiare  est:  afferamus  quod  est  nostrum,  reliqua  Deus  supplebit.  Cui  consentaneum  quod  ait  Hieronymus:  4)  nostrum  esse  incipere,  Dei  autem  perficere;  nostrum  offerre  quod  possumus,  illius  implere  quod  non  possumus.  Vides  certe,  iis  sententiis  homini  plus  quam  par  erat  ad  virtutis  studium  illos  esse  largitos;  quia  putabant  se  non  aliter  torporem  nobis  ingenitum  posse  expergefacere,  quam  si  solo  ipso  nos  peccare  arguerent.  Id  autem  quanta  dexteritate  ab  illis  factum  sit,  postea  videbimus.  Certe,  quas  retulimus  sententias  esse  falsissimas,  paulo  post  constabit.  Porro  tametsi  Graeci  prae  aliis,  atque  inter  eos  singulariter  Chrysostomus,  in  extollenda  humanae  voluntatis  facultate  modum  excesserunt,  veteres  tamen  omnes,  excepto  Augustino,  sic  in  hac  re  aut  variant,  aut  vacillant,  aut  perplexe  loquuntur,  ut  certi  fere  nihil  ex  eorum  scriptis  referre  liceat.  Itaque  enumerandis  singulorum  sententiis  exactius  non  insistemus,  sed  carptim  ex  unoquoque  tantum  delibabimus,  quantum  argumenti  explicatio  exigere  visa  fuerit.  Qui  postea  sequuti  sunt,  dum  pro  se  quisque  in  humanae  naturae  defensione  argutiae  laudem  captat,  sensim  alii  post  alios  in  deterius  continuo  delapsi  sunt;  donec  eo  ventum  est,  ut  vulgo  putaretur  homo,  sensuali  tantum  parte  corruptus,  habere  prorsus  incolumem  rationem;  voluntatem  etiam  maiori  ex  parte.  23.  Apud  Latinos  liberi  arbitrii  nomen  semper  exstitit;  Graeci  vero  multo  arrogantius  usurparunt  vocabulum,  siquidem  Αὐτεξούσιον  dixerunt,  ac  si  potestas  sui  ipsius  penes  hominem  fuisset.  Quoniam  ergo  ad  vulgus  etiam  ipsum  omnes  hoc  responso  imbuti  sunt,  praeditum  esse  libero  arbitrio  hominem,  nonnulli  autem  eorum,  qui  eximii  volunt  videri,  1)  Homil,  de  prodit.  Iudae.  2)  Homil.  18.  in  Genesim.  3)  Homil.  52.  4)  Dialog.  3.  contra  Pelagianos.