47:316  qui  morti  adiudicat  non  quos  sponte  perditos  cupit,  sed  qui  iam  sua  culpa  se  ipsos  perdiderunt.  In  summa,  non  imponit  Iudae  Christus  pereundi  necessitatem,  sed  talem  esse  pronuntiat  qualis  iam  prius  erat.  28.  Nemo  discumbentium.  Vel  nondum  aliis  retulerat  Ioannes  quid  a  Christo  audisset,  vel  ita  perculsi  fuerunt,  ut  non  essent  praesenti  sensu  :  imo  Ioannem  ipsum  verisimile  est  fuisse  quasi  extra  se  raptum.  Caeterum,  quod  tunc  accidit  discipulis  saepe  in  ecclesia  fieri  cernimus,  ut  pauci  fidelium  discernant  hypocritas,  quos  Dominus  clara  voce  damnat.  29.  Ut  pauperibus  aliquid  daret  Satis  notum  est  ex  aliis  locis,  quanta  fuerit  Christi  tenuitas,  tamen  aliquid  ex  tantillo  quod  habebat  pauperibus  erogavit,  ut  nobis  regulam  praescriberet.  Non  enim  divinassent  apostoli  de  pauperibus  loquutum  esse,  nisi  ex  more  ordinario  iuvandi  pauperes.  30.  Quum  ergo  buccellam  sumpsisset  ille,  continuo  exivit:  erat  autem  nox.  31.  Quando  ergo  exivit,  dicit  Iesus:  Nunc  glorificatus  est  filius  hominis,  et  Deus  glorificatus  est  in  eo.  32.  Si  Deus  glorificatus  est  in  eo,  etiam  Deus  glorificabit  eum  in  se  ipso,  et  continuo  glorificabit  eum.  33.  Filioli,  adhuc  ad  exiguum  tempus  vobiscum  sum:  quaeretis  me,  et  quemadmodum  dixi  Iudaeis,  quod  quo  vado  ego,  vos  non  potestis  venire,  etiam  nunc  dico  vobis.  34.  Praeceptum  novum  do  vobis,  ut  diligatis  invicem,  quemadmodum  dilexi  vos,  ut  etiam  vos  diligatis  invicem.  35.  In  hoc  cognoscent  omnes,  quod  discipuli  mei  sitis,  si  dilectionem  habueritis  inter  vos  mutuam.  31.  Nunc  glorificatus  est.  Instabat  ultima  hora:  sciebat  Christus  quam  debiles  essent  suorum  animi:  quibus  ergo  fieri  potuit  modis,  eos  voluit  fulcire  ne  conciderent.  Nos  hodie  sola  crucis  Christi  memoria  ad  trepidationem  impellit,  nisi  mox  occurrat  consolatio,  ipsum  Satanae,  peccati  et  mortis  victorem  in  cruce  triumphasse.  Quid  ergo  discipulis  accidere  potuit,  quum  mox  Dominum  visuri  essent  omni  probrorum  genere  oneratum  ad  crucem  rapi  ?  Annon  adeo  triste  et  deforme  spectaculum  centies  eos  obruere  potuit?  Quare  huic  periculo  medetur  Christus,  et  eos  ab  externo  mortis  adspectu  ad  spiritualem  fructum  revocat.  Ergo  utcunque  in  cruce  appareat  ignominia,  quae  per  se  confundere  fideles  posset,  testatur  tamen  Christus  eandem  crucem  sibi  esse  gloriosam.  Membrum  quod  proxime  sequitur,  et  Deus  glorificatus  est  in  eo,  confirmationis  vice  additum  est.  Erat  enim  iliud  paradoxon,  quod  gloria  filii  hominis  ex  morte  apud  homines  probrosa  et  coram  Deo  etiam  maledicta  emergeret.  Ostendit  igitur  quomodo  sibi  gloriam  pariturus  sit  ex  tali  morte  :  quia  scilicet  Deum  patrem  glorificet.