51:315  315  SERMON  VI  316  monstre  par  sa  parole,  et  sur  tout  quand  en  telle  briefvete  il  nous  declare  ce  qui  est  requis  pour  vivre  comme  il  appartient.  Car  s'il  y  avoit  de  longs  volumes,  et  que  ce  ne  fust  iamais  fait,  nous  aurions  excuse  de  n'estre  pas  si  grands  clercs,  et  de  ne  retenir  pas  tant  de  choses.  Mais  quand  nostre  Seigneur  en  deux  mots  nous  declare  tout  ce  qu'il  demande,  il  faut  que  nous  confessions  qu'en  ne  retenant  point  une  lecon  si  brieve  et  si  courte,  et  tant  aisee,  que  nous  sommes  par  trop  malins  et  pervers,  et  que  nous  bouschons  nos  aureilles  comme  a  nostre  escient,  pour  ne  point  escouter  ce  qu'il  nous  dit.  Or  il  y  a  pour  la  fin  en  ce  mot  de  foy  a  noter  que  sainct  Paul  non  sans  cause  dit,  La  foy  en  Iesus  Christ:  car  c'est  la  ou  il  nous  faut  regarder.  Les  peres  anciens  ont  eu  tousiours  l'image  de  Dieu  devant  les  yeux:  car  ils  ne  pouvoyent  faire  sacrifice  sinon  devant  le  propiciatoire:  ils  ne  pouvoyent  avoir  esperance  que  Dieu  les  exaucast,  ne  qu'il  leur  fust  propice  par  autre  moyen.  Ils  ont  donc  eu  ceste  image  visible  du  coffre  de  l'alliance:  mais  maintenant  nous  avons  Iesus  Christ,  l'image  de  Dieu,  qui  est  de  soy  invisible  :  car  non  sans  cause  sainct  Paul  dit  que  Dieu  est  incomprehensible  iusques  a  ce  qu'il  se  manifeste  en  la  personne  de  son  Fils.  Quand  donc  nous  avons  Iesus  Christ  qui  est  l'image  expresse  de  Dieu,  il  faut  bien  que  nous  regardions  la.  Et  voila  pourquoy  aussi  il  est  dit  qu'il  est  la  marque  expresse  de  la  puissance  de  Dieu  son  Pere.  Car  combien  que  les  personnes  soyent  distinctes,  si  est-ce  neantmoins  qu'il  nous  represente  ce  qui  appartient  et  est  utile  a  nostre  salut,  qu'en  cognoissant  le  Fils,  nous  cognoissions  le  Pere,  comme  dit  S.  Iean:  et  qui  n'a  point  le  Fils,  il  renonce  le  Pere,  quelque  protestation  qu'il  face  de  tendre  a  luy.  Ainsi  donc,  quand  il  est  ici  dit  que  nous  devons  avoir  foy  en  Iesus  Christ,  pensons  a  l'advertissement  qu'il  a  donne  a  ses  disciples,  Croyez-vous  en  Dieu?  croyez  aussi  en  moy.  La  il  monstre,  iusques  a  ce  qu'il  ait  este  manifeste  au  monde,  que  les  Peres  anciens  qui  ont  vescu  sous  la  Loy,  ont  eu  une  instruction  obscure.  Vray  est  qu'ils  ont  adore  le  Dieu  vivant,  et  mesmes  ils  n'ont  point  eu  acces  a  luy  sinon  par  le  moyen  du  Mediateur:  mais  c'a  este  sous  des  ombrages  et  figures,  et  n'avoyent  pas  une  telle  clairte  comme  nous  l'avons  auiourd'huy  en  l'Evangile.  Et  voila  aussi  pourquoy  nous  avons  dit  qu'il  est  appele  l'image  de  Dieu,  lequel  de  sa  nature  est  invisible,  et  ne  le  pouvons  cognoistre  sinon  qu'il  se  declairast  par  tel  moyen.  Bref,  notons  que  nous  ne  ferons  que  vaguer,  iusques  a  ce  que  nous  ayons  la  foy  arrestee  en  Iesus  Christ.  Et  cela  sera  encores  mieux  cognu  par  les  erreurs  dont  le  monde  a  este  abbruve  iusques  auiourd'huy.  Car  les  Papistes  protesteront  assez  qu'ils