47:315  315  IN  EVANGELIUM  IOANNIS  316  dici  uin,  quo  uni  tantum  innotesceret  Iudas,  neque  statim  produceretur  in  omnium  conspectum.  Caeterum  utile  fuit  Ioannem  huius  rei  testem  esse,  qui  aliis  postea  suo  tempore  patefaceret.  Consulto  autem  Christus  manifestationem  Iudae  distulit,  quo  aequius  feramus  latere  hypocritas,  donec  trahantur  in  lucem.  Videmus  Iudam  inter  alios  sedentem,  iudicis  tamen  ore  damnatum.  Nihilo  melior  est  eorum  conditio,  qui  inter  Dei  filios  locum  occupant.  27.  Intravit  in  eum  Satanas.  Quum  certum  sit  nonnisi  Satanae  instinctu  tantum  a  Iuda  conceptum  fuisse  nefas,  cur  nunc  primum  dicitur  in  eum  ingressus  Satan,  qui  regnum  in  eius  corde  iam  occupaverat?  Verum  ut  saepe  credere  dicuntur,  qui  in  fide  quam  pridem  habebant  magis  confirmantur,  atque  ita  fidei  accessio  vocatur  fides:  ita  nunc  quum  Iudas  prorsus  Satanae  addicitur,  ut  furioso  impetu  rapiatur  ad  extrema  quaeque,  dicitur  in  eum  ingressus  Satan.  Nam  ut  gradatim  proficiunt  sancti,  et  quatenus  novis  subinde  donis  augentur,  spiritu  sancto  dicuntur  impleri:  ita  quatenus  sua  ingratitudine  iram  Dei  in  se  impii  provocant,  Dominus  spiritu  suo  omni  rationis  luce  adeoque  humano  sensu  nudatos  Satanae  mancipat.  Haec  horribilis  est  Dei  vindicta,  dum  homines  in  sensum  reprobum  traduntur,  ut  nihil  fere  a  pecudibus  differant,  imo  in  flagitia  ruant  a  quibus  abhorrent  ipsae  pecudes.  Ergo  in  timore  Domini  sollicite  ambulandum  est,  ne,  si  eius  bonitatem  malitia  nostra  vicerimus,  tandem  nos  tradat  Satanae  libidini.  Caeterum  porrecta  a  Christo  offula,  Satanae  locum  minime  dedit,  sed  potius  Iudas  accepta  offula  se  totum  Satanae  tradidit.  Fuit  haec  quidem  occasio,  sed  non  causa.  Debebat  etiam  plus  quam  ferreum  pectus  tanta  Christi  indulgentia  molliri:  nunc  desparata  et  insanabilis  eius  obstinatio  hoc  meretur,  ut  suo  iusto  iudicio  Deus  cor  illius  per  Satanam  magis  induret.  Sic  dum  benefaciendo  hostibus  carbones  ignis  congerimus  in  eorum  capita,  si  prorsus  sunt  insanabiles,  magis  uruntur  in  suum  exitium.  Neque  tamen  haec  beneficentiae  nostrae  culpa  est,  qua  ipsorum  corda  ad  nos  amandos  inflammari  decuerat.  Falso  putavit  Augustinus,  offulam  hanc  symbolum  esse  corporis  Christi,  quandoquidem  extra  coenae  actionem  porrecta  fuit.  Nimis  vero  insulse  delirant,  qui  diabolum  fingunt  essentialiter,  ut  loquuntur,  Iudam  intrasse.  Nam  evangelista  nonnisi  de  vi  et  efficacia  loquitur.  Monemur  autem  hoc  exemplo,  quam  formidabilis  poena  eos  omnes  maneat,  qui  Domini  beneficia  abusu  suo  profanant.  Quod  facis,  fac  citius.  Non  ita  Iudam  hortatur  Christus,  ut  censeri  possit  impulsor:  potius  vox  est  detestantis.  Hactenus  illum  variis  modis  revocare  studuerat,  sed  nullo  profectu.  Nunc  ut  hominem  deploratum  alloquitur:  Pereas,  quando  tibi  decretum  est  perire.  Atque  in  ea  re  iudicis  officio  fungitur,